JV. Hluna’n CAB-a hun pe theilo hruaitu a dem

Mizoram State BJP President, Prof. JV. Hluna chuan Citizenship Amendment Bill (CAB) chungchang Meeting-ah MNF leh Congress atanga an hruaitu lian ten hun an pe thei lo chu a dem thu a sawi.

Mizoram State BJP President, Prof. JV. Hluna hian nimin khan Aizawl-a BJP Office-ah Press mite kawmin Union Home Minister hova November ni 29 Delhi-a Meeting an neih chungchang a sawi a. Meeting a tel tur hian amah BJP State President, Chief Minister, Home Minister, Congress aiawhin Zodintluanga, ZPM aiawhin, K.Sapdanga, PRISM aiawhin Vanlalruata, MZP leh MSU aiawh bakah NPP aiawhte sawm an nih thu a sawi a, “Mizoram atanga kal te hian duh thuhmun neiin kan vaia kan dinna chu ‘CAB chu Mizoram in kan duh lo’ tih a ni,” a ti.

Prof. JV. Hluna chuan Union Home Minister in Mizoram aiawhte a mal mala zawhna a pekah CAB chu Mizote tan a him loh thu leh kan duhloh thu an sawi vek tih sawiin, Amit Shah chuan Mizoram him nan ILP chu khauh taka kenkawh a nih tur thu te, NRC-a Cut-Off year dik taka hman a nih tur thu te, hetah hian kan ngaihmawh em em Chakma leh ramdang mi lo lut thar tur te dan vek an nih tur thu leh dan lova lo lutru tawh Chakma leh ramdang mi tam tak hnawhchhuah vek an nih tur thu te a sawi thu sawiin, a pathum hian Mizoram tan bik a rualin a kalkawp vek tur thu Amit Shah chuan a sawi tih a sawi bawk.

Hetiang hnam issue sawi hunah hian Political party hotu lian kal duh tlat lo leh ngaihsak lo an awm leh tlat thin chu pawi a tih thu sawiin BJP State President chuan, hetiang avang hian tunhma atang tawhin kan ram tana hun tha kan lo bawhpelh fo tawh tih a sawi a, kan Political Party lian pahnih MNF leh Congress atanga an hruaitu lian ten hun an pe thei lo chu hriatthiam har a tih thu sawiin, NGO te inpekna fakawma tih thu a sawi bawk.