Zirna lama harsatna hrang hrang sawihona nei

Federation of Mizoram Government School Teachers (FMGST) buatsaihin nimin khan School Education Department hnuaia harsatna leh chinfel ngaite sawihona neih a ni.

Aizawl-a Education Centre Conference Hall-a he sawihona hun hi School Education Minister, Lalchhandama Ralte chuan hmanpuiin School Education Department chu Mizoram sawrkar hnathawk zaa 30 bawr vel zet thawhna a nih thu leh heti zozaiin tan an lak chuan kan ram hmelhmang a tih danglam theih thu a sawi a. School-ah zirtirtu indaihlohna a nasa tih pawh sawiin, “Elementary lamah MR teacher kan lak avangin a ziaawm ta deuh a, High School lamah indaihlo tak tak an la tam hle a ni,” a ti a. Thingtlang-ah Class la thei tal School tinah awm se tih sawrkarin a duh laiin khawpuia luh dil an tam hle tih pawh sawiin, School Education Department-ah Officer an indaihloh avangin SDEO post thenkhat chu luahtu awm lo, midangin an kawp a ngaih thu a sawi a. Hemi chingfel tur hian Mizoram Education Service chu an thlir mek thu leh, MES tihhlawhtlin nan Association hrang hrangte chu inhlan then a ngai anih pawha inhuam turin a sawm bawk.

He sawihona hunah hian School Education Minister bakah School Education Secretariat-a Officer-te, Directorate-a Officer te, MBSE, SCERT, Samagra Shiksha, DIET a Officer te leh Teachers Service Association hrang hrang hruaitute an kalkhawm a. He sawihonaah hian Service Association hruaituten zirtirtute harsatna chi hrang hrang an sawite chu Official lamin chhan ngai leh sawifiah ngaite an sawifiah nghal bawk.