CAB in Mizoram a huam ve loh avangin Mizoram Lok Sabha MP chu CAB vote tir a ni

Chief Minister leh MNF President, Zoramthanga chuan Citizen Amendment Act, 2019 chu Political party, Kohhran, NGO leh zirlai pawl-ten an ngenna ang taka Mizoram huam ve lova an rawn tihpuitlin tak avangin Mizoram Lok Sabha MP, C. Lalrosanga chu vote turin a ti tih a sawi.

Nimin-a MNF Party in Aizawl-a an Office, Hnam Run kumin atana kharna leh MNF Party Exodus Day puala inkhawm an neih ah Chief Minister leh MNF President ni bawk, Zoramthanga chuan he thu hi a sawi a. Chief Minister chuan CAB chu Home Minister Amit Shah a lokal pawhin NGO, Zirlai Pawl, Kohhran leh party aiawhten CAB-ah Mizoram chu telhlo turin an ngen a. Hetiang anih hnu in Parliament-a putluh tur copy an sem a, chutah chuan ILP leh Sixth Schedule area-te chu huam teltir an ni ta lo a, chu chu pass tura Parliament-a chhawp chhuah a ni ta tih Chief Minster chuan sawiin, “Zirlai Pawl, Kohhran, NGO leh Party-ten kan rawtna ang takin kan ti ta e an tih tak si avangin, mahni rawtna do zawnga Vote leh si kha a puitlin loh thlak kan ti a. Political party, Kohhran leh NGO-te pawhin kan ngenna ang taka an rawn tihpuitlin tak avangin kan lawmthu sawina kan vawrhdarh ta a nih kha,” tiin an MP pawh party-in an rawtna leh ngenna ang chiaha an pawm avangin Vote turin an hrilh tih a sawi a. “Chuti ni lova kan rawtna ang Pass an tum dodal zawnga lo la awm fo kha a puitlin loh thlak kan ti a ni. Kan MP pawh hemi chungchang ah chuan a puitling kan ti, kan ngenna ang taka an rawn tihpuitlin hnuah duhlo anga kan la awmzui chuan, India ram, khawvel hmuhah leh hnamdang hmuhah a puitlinloh thlak hle dawn a ni,” a ti bawk.

MNF President chuan Exodus Day chung-chang sawiin, Kum 60 dawnah MNF chuan an thuthlung an la kalsan lo a. Party dangte chuan, an Party thil tum leh thuthlung an tlansan nasa tawh hle a ni, a ti a. “MNF a ral dawn titute an liam a, MNF chu a la vul zel dawn,” a ti bawk. Exodus Day hi December ni 16, 1971-a Hnam Sipai te Pathian in mak taka a chhanchhuah an hriatrengna atan hman thin a ni.

Nimin a he hun hman hi an Party Vice President, Vanlalzawma chuan kaihruaiin MNF Sr. Vice President leh Deputy Chief Minister, Tawnluia pawhin thu a sawi a, Martar-te sunna leh inhlan thar nan minute khat chhung ngawi renga din a ni bawk.