Truck Driver te lungawilohna karah sawrkar in Vawiin atangin Buhfai phurh a tum dawn

Mizoram-a buhfai phurtu lian Carrying Contractor te leh Mizoram Truck Driver Association (MTDA) te inkar buaina kal zel avangin ni 20 chhung zet chu retailer te sem turin buhfai phurh mumal a ni tawh lo a. FCS&CA changtu Minister, K. Lalrinliana chuan engti kawng zawng pawhin buhfai an phur dawn tih sawiin, buhfai a tam thu a sawi bawk.

Mizoram-a FCI Kudam atanga buhfai phurhchhuah hmasak dan indawt (serial number) leh unload hmasak dan indawt ruahman chungchanga buhfai phurtu Carrying Contractor-te leh MTDA inkarah harsatna thleng kal zelah Truck Driver ten lungawilohna lantirin kawngpui te dan a ni a, hemi chungchangah hian Supply Minister, K.Lalrinliana chuan Inrinni khan Aizawl Press Club-ah thuthar thehdarhtute kawmin lirthei lian khalhtute’n buhfai phur duh lova kawngpui an dan chah avanga mipuiin an tawrh lohna turin sawrkar chu khauh takin a kal dawn a ni, a ti a. He harsatna chinfel a nih theih nan hian sawrkar chuan nasa taka hma a lak thu sawiin, buhfai phurtuten an phurh duh tak loh avangin sawrkarin a remchan dan angin buhfai phur tur a ngaihtuah dawn tih a sawi a. Inrinni zing khan sawrkar mi pawimawhte thukhawmin, December a buhfai sem tur nei daihlo Supply Centre 35-a buhfai pek dan tur leh FCI Godown atanga Mizoram buhfai tang phurhchhuah a nih theihna turin an ngaihtuah thu a sawi bawk.

Supply Minister, K. Lalrinliana chuan he thutkhawm a thutlukna an siam angin sawrkar Vawiin, December 2, 2019 atang hian bul tan tumin hma lak tur a ni tih sawiin, mipuiten sawrkara chanvo an neih, an buhfai dawn tur an dawn lohna tura hma late hi sawrkar chuan a ngaih zam loh tur thu a sawi a, “A tul a nih chuan sawrkar department Truck ho te pawh kan hmang mai anga, a tul chuan Police lam pawhin an Escort mai ang,” a ti a, he thil thleng avang hian Mizo mipui te chu chi-ai lo turin a ngen bawk.

Hetihlai hian Supply Department hnuaia Mizoram hmun hrang hranga buhfai phurh hna thawktu Carrying Contractor-te chuan hun enge-maw chen Ramrikawn FCI Kudam atanga buhfai an phurhchhuah loh hnuah Inrinni khan Motor 23 nen buhfai phurhchhuah tum hian an thawk-chhuak a, Police te venna karah buhfai hi phurh-chhuah niin Police lam ten an veng zui a, lo dan tum Driver thenkhat mante pawh an awm nia thudawn a ni a. He harsatna thleng mek avang hian lirthei neitu thenkhat chuan an driver te an ban bakah Truck Driver Association lam pawhin buhfai phurh tum Driver thenkhat chu an member atangin an bân nia thudawn a ni bawk.