Contractor ten hleih neiah MTDA an puh

Mizoram Carrying Contractor Association hruaitute chuan Mizoram Truck Driver Association chu rualkhai taka buhfai phur duhlo leh kal duhna bik neiah an puh.

Mizoram Carrying Contractor Association hruaitu te chuan Truck driver hruaitute hian serial number enkawlin kal hmasa apiang buhfai hi load tir tur an nih laiin kal duhna bik an nei niin an sawi a. Heng an kal duhna bik Centre a thawk te nen inthurualin thil an ti ho thin nia an hriat thu an sawi. Carrying Contractor hruaitute chuan, "Serial number indawta kaltir lovin an hruaitu ten duh an thlang (pick and choose) a. An hruaitute hian hmelhriat an neihna hmunah kal an chuh thin a, Centre-ah hian buhfai thlen lovin kawng laka an hralh hnuah a pawisa in an pe leh mai thin niin kan hria a, hei vang hian mipui pawhin an ration chan tur zat hi an chang/dawng thei lo niin kan hria a ni," an ti a. Buhfai chu kawng laka hralh zo vek pawh nise a phurh man chu an pe vek zel niin an sawi bawk.

Mizoram Carrying Contractor Association hruaitute chuan Truck Driver Association ten Truck pakhat zelah tihluihna a Rs. 100/- an la te, an member nilo phurh an phal lo leh carrying contractor motor te phurh an phal ve thin lo chu hriatthiam har an tih thu an sawi bawk.