Kumin chhungin Civil Hospital Aizawl Out Patient Department pantu nuai 3 tling tawh

Kumin chhung hian Mizoram-a damdawi In lian ber, Civil Hospital Aizawl-a Out Patient Department-ah mi nuai thum chuang inentir an awm tawh a, heng zinga nuai 2.5 chu inentir thar an ni. He hospital-a khum awm hi mi zaa 84.53 in an luah reng ang a ni.
Nimin khan Mizoram Journalists' Association (MJA) Gen. Hqrs. hruaitute chuan Civil Hospital Aizawl Medical Superintendent, Dr. Lalhmuchhuaka kawmion Hospital dinhmun leh hmalak mekna te an sawipui a. He huna Civil Hospital Aizawl hotute report-a tarlan danin, kumin January atanga October thleng khan OPD-ah mi 3,29,106 an inentir tawh a; heng zinga 250,856 hi inentir thar (case thar) niin inentir mek (case hlui) pantu 1,16,249 an ni a, a casualty pantu 37,999 nen aa vaiin he Hospital pantu hi he10 chhung hian mi 3,67,105 an ni a. OPD pantu zinga 11007 chu Hospital-ah hian admit an ni a, Casualty pantu zinga mi 775 chu admit an ni bawk a. Kumin chhungin October thleng khan mi 68,700 admit an awm tawh a, damdawi In khum hi za zelah 84.53 luahkhat reng anga ngaih a ni.
He thla 10 chhung vek hian Civil Hospital-a investigation ti leh a kawihhnawiha laboratory pantu hi mi 7,72,464 an awm bawk a. Damlo mi 2156 chu Mizoram pawn lamah refer niin mi 14769 zai an ni a, heng zinga 5858 chu zaipui tawk an ni a, October thleng khan Civil Hospital Aizawl-ah hian nau piang 3618 an awm tawh a, mipa 1857 leh hmeichhia 1761 an ni a. Damlo thi 536 an nei thung a ni.
Civil Hospital Aizawl-a Medical Superintendent chuan an damdawi In chu damlo a mamawhtute tana pan manhla ni turin theihtawp an chhuah ve reng a, chutihlaiin tih dikloh leh famkim tawklohna lai an ngah ang tih an ring tih a sawi a. Hengah te hian ralkhat atanga tawng mai lova mipui ta, kan zavai ta a ni tih hria a, a thatna tur zawka thawhpui turin mipui leh chanchinbumite a sawm tih a sawi a. Vaihlo zial zuk leh damdawi In vawnfai kawngah te mipuiten a neitu chan an la chang thiam tawklo deuh em tih te ngaihtuahna ah a awm tih a sawi bawk.
MJA hruaitute zawhna chhangin Dr. Lalhmuchhuaka chuan, TRAUMA Centre dinna tur chu hna thawh theih turin an inpeih hnai tawh nia an hriat thu leh, a sakna tur bula PHE tui pipe leh telephone hrui sawn hmasak ngai awm chu sawn a nih ve leh hna hi tan theih a nih an rin tawh thu an sawi a. Staff Quarters tur chu ram an neih mumal tawh loh avangin tihngaihna a awm tawh lo nia sawiin, tunah hian Quarters tiha chhal tham meuh lo Room 8 chu Emergency thil tak taka duty turte awmna tur te tak te te an nei tih a sawi.

Comments

Chhiar Hlawhte