New 132KV Grid Power Sub-Station hawn a ni

Power and Electricity Department changtu Minister, R. Lalzir-liana chuan Mizoram-a Power Transformer Sub-Station lian ber - New 132KV Grid Power Sub-Station, Zuangtui chu nimin chawhnu khan hman theih turin a hawng.

New 132KV Grid Power Sub-Station, Zuangtui hawnna hunah hian P&E Minister, R. Lalzirliana chuan Transformer lian hunna, 132KV Grid Power Sub-Station hawn a ni ta chu lawmawm a tih thu sawiin, P&E Engineer-te leh thawktu zawng zawngte thawhrim rah a nih thu a sawi a. Ramin hma a sawn a, kawlphetha mamawh pawh a pung zel a, peak hour-a 80MW vel hmang thin khan tunah chuan 110 MW te a thleng pha tawh tih a sawi a. Tuna kan hman mek hi nakin lawkah kan khawp khamloh hun a thleng leh mai dawn tih sawiin, inzarpharh zelna tur leh hmun dang atanga electric lo lut dawnna hmun neih a pawimawh avangin sawrkar ramte humhalh a tul hle a ni, a ti a. Mipuite mamawh Eng pe tura rim taka mutmu pawh tuah hman mang lova hna thawk thin te thawhrimna leh inpekna chu a fak bawk.

Mizoram-ah Electric mamawhna nitin a sang chho zel a, 132KV Sub-Station-a Transformer lian awmte chuan mipui mamawh a phuhru zo tawh lova, chumi sutkian nan chuan Transformer lian 25MVA, 132/33KV pahnih chu hman theihin he Zuangtui Sub-Station tharah hian bun fel a ni a. He Transformer lian hi a hmaa hman thin 12.5MVA, 132/33KV aiin a letin a lian zawk a. Zuangtui Sub-Station hi Mizoram pawn atanga Power lakluhna hmunpui leh hmasa ber niin Aizawl khawpui bakah Mizoram District pakua (9)-ah Electric Power a pechhuak a, chu chu Mizoram-in Power kan hman hmun thum a then a hmun hnih (2/3) vel a ni.

Zuangtui Sub-Station hlui hi kum 1988 November thla-ah 6.3 MVA, 132/66KV Transformer-in bul tan a ni a, kum 2001 July thla-ah 12.5MVA, 132/33KV Transformer-in tihlen leh a ni a. Zuangtui Sub-Station hmun hlui hi kum 1992-a chhiatna lian tak, lei tlahniamin a nuai atang khan a himlo hle tih hriat a ni a, hmun him a sawn leh Power demand sang zel avanga Transformer lian zawka thlakna tur leh he Sub-Station sawnna tur hian NEC Fund cheng nuai 1869.30 leh State Plan Fund cheng nuai 911.12, a vaiin cheng nuai 2780.42 sen a ni. Kawlphetha mamawhna lo sang chho zel tur pawh he Sub-Station thara Transformer lian hian hun engemaw chen min phuhru ngei thei turah P&E Department chuan an ngai a ni.

New 132KV Grid Power Sub-Station, Zuangtui hi NEC Fund leh State Plan Fund atangin Power & Electricity Department hnuaiah Aizawl Power Circle kaihhruainain Generation Division leh Zuangtui Sub-Station Sub-Division-ten an thawk a ni.