Serchhip Police ten Heroin nia hriat an man

Serchhip Police te chuan nimin chhun khan Keitum khua ah Heroin Hawng thum (3) manin a kengtu leh an pek tur nia an sawi te chu man nghal an ni.

Serchhip Police te hian nimin chhun dar 11:30 vel khan Zokhawthar atanga Bike rawn kal (Mz-01-D/5641) atangin heng Heroin te hi an man a, Heroin hi pocket pathum-ah dah niin Nghapih zingah dah chu Police te hian an man a, a rawn kengtu mi 2, H. Lalzothanga (49) leh Lalneihtluang (40), Zokhawthar nia inchhal ve ve te chu Police te hian an man nghal a ni. Heng mite hian nizan dar 8:00 vel khan Zokhawthar atanga rawn chhuakin Keitum-ah heng an thil ken te hi inhlan tur an nih thu an sawi a, Serchhip-a an hlan tur nia an sawi hmeichhe pahnih te pawh Police te hian thu zawhfiah turin an la nghal bawk a, heng mite lo buaipuitu midang pakhat, Keitum khua pawh man nghal a ni.

Heng Heroin rawn kengtute hi Serchhip Police te chuan thubuai siam sak nghalin an Heroin rawn ken hi a vaiin gram 41.46-a rit a ni a, a vai hian cheng nuai 4 man vel nia ngaih a ni.