Food, Civil Supplies and Consumer Affairs Department Director, Dr. Lalhriatzuali Ralte chuan hunpui a ruaithehna atan buhfai leh eirawngbawlna Gas hman turah harsatna a awm lo tih a sawi.
Tunhnaia Petrol leh lama harsatna thleng chungchangah Supply Department Director chuan Aizawl-a tuialhthei zawrhna zawng zawngah khuahkhirhna awm lova tuialhthei hralhchhuah mek a ni tih sawiin, Phailam atangin tuialhthei hi a lo thleng tha reng tawh a, engmah harsatna a awm hranpa tawh lo tih a sawi a. Eirawngbawlna Gas pawh Borkhola leh Mualkhang Bottling plant atangin chatlak lovin rawn phurh chhoh reng a nih thu a sawi a. Buhfai pawh Mizoram chhunga Food Corporation of India (FCI) kudam 6 - Bairabi, Rengtekawn, Bualpui, Tanhril, Lunglei leh Lawngtlai-ah te buhfai dahkhawl hi a tam tawk niin FCI hotute hnen atanga thu an dawn thu a sawi a. FCI kudam atang hian Supply Department chuan buhfai a la chhuak mek a, December a mipui hnena sem tur chu semchhuak tawhin January thla chanpual an semchhuah tur pawh phurchhuakin Department Kudam-ah an chhek mek tih a sawi. Chhungkaw harsa lehzual (AAY) chhungkaw 25,960 te hnena man tlawma Chini hralhchhuah pawh December thla thleng pekchhuah a nih tawh thu sawiin, Chhungkaw pakhat tana Kg khat zela man tlawm zawka chini hralh hi Kg. khat Rs. 23.50 a pek a ni a, sawrkar hian Chini hi MIZOFED atangin Kg. khat Rs. 42 in a lei a, sawrkar laipuiin Kg. khat zelah Rs. 18.50 a rawn tum ve a ni.
Comments
Post a Comment