Union Home Minister hovin CAB sawihona neih a ni

Union Home Minister, Amit Shah chuan sawrkar laipui in Citizenship Amendment Bill (CAB) pass a tum chungchang chu Zirtawpni zan khan Mizoram-a Political hrang hrang leh tlawmngai pawl hruaitute New Delhi-ah a sawipui a. CAB chu kaltlangpui tum a nih thu a sawi rualin, Mizoram himna tura hmalak a tiam a, Mizoram atanga kal te erawh chuan sawiho leh phawt an duh thu an thlen thung a ni.
Joint NGO Coordination Committee hruaitute sawi danin he an inkawmna ah hian Union Home Minister chuan Citizenship Amendment Bill (CAB) chu Mizo mipuite tan a hlauhawm loh tur thu sawiin, kumin October ni 5-a Mizoram a rawn tlawh tuma alo sawi tawh angin Mizoram in inhungbikna Dan a neih mek, Inner Line Permit chu thuam chaka tun aia tih changtlun a nih tur thu a sawi a. Mizoram ramri venghim turin Mizo thalai hlang awmna BSF leh CRPF din a ni anga, Assam sawrkar in a kalpui tawh, National Register of Citizen chu Mizoram-ah pawh kalpui tur niin hetah hian tehfung atan kum 1971-a Mizoram-a awm tawh te hman a nih tur thu a sawi bawk.
He inkawmna ah hian Mizoram aiawhte chuan sawrkar laipui in ruahmanna hrang hrang a neih te chu tha viau mah se CAB kaltlangpui chu an remtih theihloh thu leh sawrkar laipui hotu ten CAB dodal nana lungawilohna lantir tawhlo tura an ngenna pawh tih hlawhtlin ngawt theih a nih loh thu sawiin, an thu ngaihtuah ho chu Aizawl lama inrawnkhawmna neia an sawiho ve phawt tur thu an sawi a. Sawrkar laipui in ILP thuam chak a tum thu a sawi chungchangah pawh ILP leh CAB chuan inzawmna a neihloh avangin ILP thuamchak a nih avanga ngaih tih that ngawt chi nia an ngaih loh thu an sawi bawk.
He inbiakna ah hian sawrkar laipui hotute chuan Mizoram mipui duhdana Tripura-a awm mek Tuikuk te Mizoram-a hruaikir tumna chu chhunzawm a nih tawhloh tur thu an sawi a. Hei hi lawmawm viau mah se tuna an inbiakna thupui ber a nih loh avangin lungawi phah nan hman an tumlo tih NGO hruaitute chuan an sawi bawk.

Comments

Chhiar Hlawhte