MNF sawrkar-in kum khat a tling ta; mipui beisei an pha lo nasa hle - MPCC

Mizoram Pradesh Congress Committee (MPCC) chuan December 15, 2019 khan MNF sawrkar chuan kum khat a tling ta tih sawiin, kum khat chhung hian ram tana thil pawimawh, hmasawnna lian tham pakhat mah tih an la nei lo mai ni lovin, mipui hnena an thutiam tam tak an bawhchhiat avangin beidawnna nen mipuiin sawrkar an thlir mek niin an sawi.

Nimin a thuchhuah an siamah MPCC chuan he thu hi tarlangin, MNF sawrkarin mipui beisei a phak lohna hrang hrang tean tarlang a. Kum khat lek chhungin MNF sawrkar leh Lok Sabha MP, C. Lalrosanga-te chuan BJP-ten Hindu lal ram din nana an ruahman CAB 2019 thlawpin Mizoram leh a chhunga chengte min hralh hman nia tarlangin, CAB duhlohna nasa taka lantirtu Mizoram mipui, NGO-te leh Kohhran mipuite an zahloh zia an chet danin an tarlang zui zel bawk niin an tarlang.
Hei bakah hian Mizoram Chief Minister, Zoramthanga chu kum 10 liamtaa an sawrkar hun lai ang bawk khan a thu sawi dan, a thu tiam dan leh a ngaih pawimawh zawng (MAU) thlengin danglam a la awm reng reng lo nia tarlangin MPCC thuchhuah chuan, kum khat lek chhungin ama thu sawi ngei hmangin nuihzatbur-ah a insiam hman niin an tarlang a. Inthlan hmaa mipui hnena nuai 3 an tawktarh chu an sawrkar hnuah an sawi dan a dang leh daih nia tarlangin, “Kum khat an sawrkar chhungin Budget-ah SEDP atan cheng vbc.750 an dah chungin SEDP dawng hmel hmuh tur leh sawi tur an la awm miah lo,” an ti bawk.
MPCC thuchhuah chuan MNF sawrkar chu hmasawnna hna thawh aiin hming thlak ah an buai nasa nia tarlangin, Mizoram Institute of Medical Education and Research (MI-MER) chu Zoram Medical College (ZMC) tiin a hming an thlak thu leh he kum khat chhung hian ZMC tihmasawn/tihchangtlunnna kawnga an chetna lian tham pakhat mah hriat tur a awm loh thu an tarlang a. Chief Minister, Zoramthanga'n ‘Aizawl hi traffic jam lohna awm chhunah kan siam dawn,’ tia a sawi chu an sawrkar hlim, kum 2018 Krismas leh kumthar inkar a mithiam rual a enpui bak chu kum khat chhung hian an hmalak zuina thawm mipui hnena tarlan a awm miah niin an tarlang bawk.

Comments

Chhiar Hlawhte