Mizoram State Games atan Serchhip bial Jersey tlangzarhin infiammi te fuih an ni

Mizoram State Games neih tur atana Serchhip Assembly Constituency aiawha kal turte fuihna leh an Jersey tlangzarhna chu nimin khan Serchhip Bazar-ah neih a ni a, bialtu MLA, Lalduhoma chuan a hmanpui a ni.

Serchhip Constituency aiawha infiammi kal turte fuihna leh thlahna hunah hian bialtu MLA, Lalduhoma chuan he State Games neih tur atan hian sawrkar atanga sum hmuh a tam tham loh avangin sawrkar Department, VC leh mimal tlawmngai te hnenah Vehbur khawn a nih thu sawiin, sum thawhtu zawng zawng te chungah lawmthu a sawi a, he infiamna hunpui neih tur atana Serchhip Bial tana tha leh zung sengtute chungah lawmthu sawiin, he infiamna huna Serchhip Bial tana Ambassador hna thawk tur an ni tih in hre reng turin a chah a. Harsatna tawk lova an inbuatsaihna ang hlenchhuah tum tura chahin, chumi ti thei tura lo tawngtaipui turin Serchhip Bial mipuite pawh a sawm bawk. Serchhip bialtu MLA chuan Infiammi tan hun vawndik leh zam lova inelna a tel theih a pawimawh thu sawiin, theihtawp chhuaha champion ngei tum turin a chah a, eng result pawh nei ni mah ila theihtawp kan chhuah chu a pawimawh thu sawiin, an results neih ang angah lungawi tum turin a chah a, khawtlang in a lawm tham result rawn hawn tum ngei turin a chah bawk. Hemi hnu hian Bialtu MLA hian Serchhip Bial tana Jersey buatsaih chu a tlangzarh nghal a ni.

Mizoram State Games neih tura Serchhip Constituency tana Working Committee Chairman, H. Dolianbuaia kaihhruai he hunah hian Serchhip District Bawrhsap, Sangchhin Chinzah chuan infiammi te fuihna thu sawiin, eng infiamna ah pawh mahni inthununna neih a pawimawh thu leh chu chu hlawhtlinna atan thil pawimawh a ni tih hre reng turin a chah a, infiammi rilru pu chunga he inelna ah hian tel tur leh Serchhip Bial tana an theihtawp chhuah tura chahin, khualkhua ah an kal avanga zam mai lova an an thiamna ang phochhuaka hlawhtlinna chang ngei turin duhsakna a hlan bawk.

Karleh a neih tur Mizoram State Games-ah hian Serchhip Assembly Constituency hian Sports discipline 22-ah infiammi leh anmahni hruaitu mi 213 a tir dawn a, a hmasa ber turin Football khel turte chuan nimin khan Aizawl pan nghalin bialtu MLA, Lalduhoma chuan a thleng dawn a ni.

Nimin a he hun hmanna ah hian Organising Committee Secretary, Vanlalhruaia chuan Mizoram State Games neih tura Serchhip bial aiawha tel turte inbuatsaihna report pein Players leh Official te inhmelhriattirna hun a hmang a, zaithiam zai te ngaihthlak a ni bawk.