MZP in naktuk-ah Total Bandh huaihawt an tum

Mizo Zirlai Pawl (MZP) chuan India hmarchhak State thenkhata Citizenship Amendment Bill (CAB) hman tum duhloh entirnan naktuk, December ni 10, 2019 (Thawhlehni) zing dar 6:00 atanga tlai dar 4:00 inkar hian Aizawl khawpui ah Total Bandh an nei dawn a. District khawpui dangah chuan Bandh hi nei lovin zirlai ten a remchan angin Sit in Protest an nei ang.

Inrinni-a MZP Executive Meeting chuan hmarchhak zirlai pawlte inthlunkhawmna, North East Students Organisation (NESO) thu anga Citizenship Amendment Bill (CAB) dodala December ni 10, 2019-a Total Bandh neih dan tur a ngaihtuah a, MZP chuan CAB hi hmarchhak tan thalo a tih avangin hmarchhak huapa he thil dodal hi tul a ti a ni.

He thutkhawm an neih hnua thuchhuah an siamah MZP chuan India sawrkarin hmarchhaka ILP hmanna state pathumte leh Sixth Schedule area-te CAB huamtir loh a tum tih chu tha tawklo an tih thu sawiin, thenawm State-ah CAB an hmang tho a nih chuan Mizoram pawh a tuartu a ni thei tih chu MZP ngaihdan a ni tih an sawi.

Hmarchhak zirlai inzawmkhawm NESO chuan India hmarchhak state thenkhata CAB hman loh tur tih leh hmun thenkhata hman tum si chu hmarchhak mipuite inlungrualna tihchhiat tumna leh then darh tumna ah a ngai a, hmarchhak mipuite nekchepna leh ram leilung fate aia ram pawn lam mite uchuak taka duhsakna lantirna tur a ni ngei tih hi NESO ngaihdan a ni tih an sawi bawk.