Serchhip-ah PMVVY Week kharna neiin he Hapta pual Rally neih a ni bawk

Social Welfare Department hnuaia Pradhan Mantri Matru Vandana Yojana (PMMVY) kalpui mek puala kar kalta Thawhtanni atanga Serchhip-a PMVVY Week-Matru Vandana Saptah hman chu Inrinni zing khan a kharna neiin he Hapta puala Rally neih nghal a ni bawk.

PMVVY Week-Matru Vandana Saptah kharna puala Rally hi Inrinni zing khan Serchhip Tuikhuah Veng atanga Serchhip AOC Veng thleng neih niin Serchhip-a YMA Chhang bakah ICDS-a thawk te leh Anganwadi Workers te an tel a. He huna tel te hian ram hmasawnna atan mihring hriselna a pawimawh thu leh mihring hrisel ni tura nu in nau a pai lai atanga inenkawlna tha a dawn a pawimawh thu leh hri dana tha taka a lak a pawimawh thu te, chumi atan chuan sawrkar laipui in PMVVY a duan chu chhawr tangkai a pawimawh zia te an aupui bawk a ni.

He Rally neih zawh hnu hian Serchhip Bazar-ah he Hapta kharna puala inkhawm neih zui niin Serchhip ICDS Project-a CDPO, Lalbiakliana chuan he Week tluang taka hman a ni chu lawmawm a tih thu a sawi a, Thawhtanni atanga he Week an hman chhunga an hmalakna hrang hrangte pawh sawiin, heng an hmalakna hrang hranga theihtawp chhuaha hna thawktu zawng zawngte chungah lawmthu a sawi a, sawrkar laipui in he ruahmanna a siam te mipui ten nasa zawka an chhawr tangkai theih nan midangte hrilh chhawng zel turin mipuite chu a chah bawk.

MVVY Week hman chhung hian ram-pum huap inelna neih niin Anganwadi Workers ten an bial chhung-a In tin tlawhin PMVVY hnuaia tanpuina dawng thei tur dapchhuah hna thawkin hetiang mi an hmuh te chu Office lamah thehlutin anni hian sawrkar laipui-ah an thehlut ve leh a, he Hapta hman chhung hian mi 200 vel thehluh hman niin thehluh zui zel tur a ni ang.

Hei bakah hian he Hapta hman chhung hian F. Hmingthankimi, District Programme Coordinator PMVVY hovin NGO hrang hrang hruaitute chuan Meeting neiin he Scheme inzirtirna leh hmalak zel dan tur sawihona te an nei bawk a. Thenzawl, East Lungdar leh Chhingchhip khua ah te Health Department nen tangkawpin nu leh naupangte tan chaw tha ei pawimawh zia inzirtirna te pawh buatsaih a ni bawk.