Ruihhlo vangin kumin ah mi 52 an thi tawh

Kumin kumtir atang khan Mizoram-ah damdawi hmansual/drug kaihhnawiha thi mi 52 an awm tawh a. Drug vanga Mizo thalai te thihna thlentu tam ber chu Heroin (No.4) a ni.
Mizoram Excise & Narcotics Department chhinchhiah danin kumin chhunga damdawi hmansual vanga thi zinga 39 hi mipa an ni a, a bak mi 13 hi hmeichhia niin Thi zinga 25 hi Heroin vanga thi an ni a, a dang 27 hi Heroin leh damdawi hrang hrang tihpawlh an ni thung. Excise & Narcotics chhinchhiah danin kum 1984 atanga he thu buatsaih lai thlengin damdawi hmansual vanga thi mi 1576 an awm tawh a, heng zinga 1391 hi mipa niin hmeichhia 185 an awm bawk.
Kum 2014 hmalam kha chuan damdawi ti thin te thihpui tam ber chu Parvon Spas/Proxyvon a ni a, mahse kum 2015 atang chuan Heroin chu an thihpui tam ber a ni ta thung a. Heroin vanga thi hi mi 213 chhinchhiah an ni a, Parvon Spas/Proxyvon vanga thi mi 1161 leh tihpawlh vanga thi 202 chhinchhiah an ni bawk. Excise thawktu te chuan Mizoram-ah Zu khuahkhirh anih avangin Drug ti an tam phah chuang lemlo niin an sawi a. Drug chu tunhma aiin a vang zawk nia an hriat thu sawiin, ni danga khawchhak lam atanga lokal nasa thin chu tunhnaiah Bagha lam atangin a lo lut nasa niin an sawi a, Bagha lam atanga lokal hi Manipur atanga lut nia an rin thu an sawi. Heroin pawh nidang aiin a to deuh nia sawiin, ni danga hawng khat (14 gram vel) Rs. 25,000 vel ni thin chu tunlai hian Rs. 30,000 velah a chho niin an sawi bawk.

Comments

Chhiar Hlawhte