I&PR buatsaih Press Study Tour-a kal ten Mizoram an rawn thleng leh ta

Mizoram Sawrkar Information & Public Relations Department buatsaiha Andaman and Nicobar Islands-a Press Tour a zin mi 12 (I&PR Department Official 3 leh Mizoram Journalists Association member mi 9) te chuan Pathianni khan Aizawl an lo thleng leh ta a. Press Tour neih chhung hian Andaman a Sawrkar mi pawimawhte an hmuh bakah hmun pawimawh te an tlawh bawk a ni.
He Press Tour-a kalte hian December ni 9, 2019 khan Aizawl chhuahsanin a tuk December ni 10-a Andaman and Nicobar Islands khawpui, Port Blair an thleng a. Port Blair-a an cham chungin Port Blair a hmun pawimawh hrang hrang an tlawh a, chung zingah chuan Chatham Saw Mill (Asia khawmuala thingzai factory lian ber leh upa ber kum 1983 a din) te; Cellular Jail (British in India an awp laia tan In rapthlak leh zalenna sualtu ten tihduhna leh khaihlum hial an nihna hmun) te, Ross Island (British in Andaman thliarkar an awp tanna hmun) leh Havelock Island (An Tourism Circuit a khualzin te hip ber hmun) te bakah Zonal Anthropological Museum (Andaman thliarkar a cheng hnam tlem te, tumah tlawh phal loh te chanchin pholanna hmun) te leh Indian Navy te Musuem, Tuipui nungcha hrang hrang te dahna hmun Samudrika Marine Museum te a tel a ni.
Port Blair-a an cham chhung hian Andaman & Nicobar Administration Chief Secretary, Chetan B. Sanghi leh Information Publicity & Tourism Andaman & Nicobar Administration hotute leh chanchinbu mite nen inkawmhona tha tak an nei a. India a sawrkar enkawl nitin chanchinbu chhuak awmchhun, kum 1920 atanga chhuak – The Daily Telegrams Chief Editor, Kanak Radha Chatterjee-i leh a thawhpuite nen inkawma hun an nei bawk a ni.
He Tour-a kal Chanchinbu mite hian Port Blair fai leh thianghlim zia te, thliarkar zimte ni chunga kawng zau tak an neih te, kawng sir an cheibawl dante, an tualchhung thil siam – Handicrafts counter an enkawl dante leh hengte hi khualzin ten an bawr dan te, a mawina khawih danglam lova natural spot an humhalh dante chu zirtham nia an ngaih thu an sawi a ni.
He Press Tour a kalte hi Andaman Administration-a Information, Publicity & Tourism a Editor, Biju Nair leh a thawhpuiten Airport ah lo hmuakin an cham chhung zawng hian an hruai kual a. Press Tour-a kal te hi I&PR Department atangin Director, Lallianpuii leh Joint Director, C. Lalnunkima ten an ho a ni.

Comments

Chhiar Hlawhte