Hunpui lo thleng tur atan inbuatsaihna sawiho a ni

Nimin khan Serchhip District Bawrhsap Pisa ah Krismas leh kumthar lo thleng tur mipui ten hlim leh ralmuang taka an hman theih nana dan leh thupek kenkawh dan tur sawihona neih a ni.

He sawihona hun hi Bawrhsap mawhphurhna la mektu Addl. Chuauhnuna chuan kaihruaiin Police Department lamin venhimna kalpui dan tura ruahmanna an siam te Addl. SP, PC. Lal-tanpuia chuan a sawifiah a, Serchhip Sub-Hqrs. YMA President, R. Sanghmingthanga pawhin heng hunpui lo thleng tura Branch tinte inbuat-saihna leh Sub-Hqrs. in ruahmanna a siam te a tarlang bawk a. Hemi hnu hian khawpui chhunga Village Council aiawh ten tul leh mamawh awm ni a an hriat te an sawi ve leh hnuah hmalak dan tur hi sawiho a ni.

Hunpui lo thleng tur vuakvet-ah hian Police Department chuan bial insemin venhimna an kalpui dawn a, chhun leh zanah patrolling an nei reng dawn a, dan bawhchhia te chu inthlahrung hauh lova an hnena report zel turin mipuite an ngen a ni. Traffic Police lam pawhin ruahmanna siamin uluk leh khauh taka dan kenkawh an tum a, lirthei ri ring lutuk te, phal chin baka tlan te leh dan bawhchhe dang te chu an hnena report zel turin mipuite an ngen a. YMA Branch tinte pawh anmahni huamchhungah an duty leh dawn a, a tul ang zelin Police te nen an thawk ho dawn a ni.