Private Hospital ten Permanent Registration neih ngai

Sawrkarin Clinical Establishment Act, nakum January ni 17 atanga Mizoram-a a hman tan turah Private Hospital te chu Sawrkar-ah Permanent Registration nei vek tura tih an ni.
Health & Family Welfare Secretary, H.Lalengmawia chuan hemi chungchang hi Inrinni khan Aizawl-a thuthar thehdarhtute hrilhin, tuna Sawrkarin Clinical Establishment Act hnuaia Hospital-te hman tur Notified Rate a siam chu an pawm a ngai dawn a, registration neih tho a ngaih dawn avangin Vawiin-a rate an pawm loh hian awmzia a nei dawn lo niin a sawi.
Health Secretary, H. Lalengmawia chuan Clinical Establishment Act hi sawrkar enkawl ni lo damdawi In ten an zawm lo a nih chuan Private damdawi in neitute tan damdawi In enkawl a har viau tawh dawn tih a sawi a, he Act hnuaiah hian sawrkar Doctor te, Private Hospital-a thawh a khap vek tawh dawn tih sawiin, harsatna an tawh hunah sawrkar hnenah tho an tlukluh leh a ngai dawn a, chutiang huna tha taka sawipui theih an nih theih nan tha takin mipui damlo harsa te avangin he sawrkar notified rate hi an pawm a, an rawn zawm vat a tul a ni, a ti.
Health Secretary chuan Health Care Scheme hnuaia damlo te Re-Imbursement mumal leh felfai zawk a kalpui theih nan Sawrkar pawmpui, Central Government Health Scheme rate zulzuiin Notifed rate siamthat a nih thu a sawi a, hei hi Private damdawi In te chuan an duhlo a, an rate siam thar kalphung leh a phena awm thilte inhrilhfiahna pawh neih niin, rate an duh dan leh Central Government Health Scheme rate behchhana thehlut tura hrilh an ni a, amaherawhchu thehlut an awm lova, damdawi In neitute inzawmkhawm pawl NGHAM in Private Hospital zawng zawng aiawhin May ni 31-ah a thehlut a, hei hi sawiho a nih hnuah an lungawi tlang hle tih tawngkam an neih avangin ngaihngam takin sawrkar chuan notification leh Gazette a chhuah ta a, a hnuah 'barhluih' tiin damdawi In hrang hrang te hian an sawi leh ta si niin a sawi bawk.
Hei bakah hian Health Secretary chuan Notified Rate hian Hospital level hrutrual a tum loh thu leh Clinical Establishment Act hman hunah chuan level te te in rate pawh a hrang dawn tih a sawi a, chu chu Notified Rate Gazette Notification-ah pawh chiang taka tarlan a nih thu a sawi a. Private Hospital duh dan chuan sawrkar in a reimburse theih chin rate a siam anga, a bak zawng chu damlo hnen atangin Private damdawi In te chuan an la mai dawn a ni a, hei hi sawrkar thil tum- ‘Damlote'n an senso an hmulet thei tura ni’ tih a kalh tlat a nih thu a sawi a. Mipui te hmakhua ngaihtuahin tuna Private Hospital he dan zawm duhlo te chu inngaihtuah tha leh se a tih thu Health Secretary chuan a sawi a, zawm thuai turin a sawm nghal bawk.

Comments

Chhiar Hlawhte