MZP in CAB dodalna kalpui zui zel nise an ti

Mizo Zirlai Pawl (MZP) chuan Citizenship Amendment Bill chu kan ram leh hnam tana himlo anih avangin dodalna kalpui zel nise an ti.

MZP General Hqrs. hian nimin khan Aizawl-a an Office-ah an President, B. Vanlaltana kaihhruaina hnuaiah Executive Meeting neiin Citizenship Amendment Bill, 2016 chungchanga hmalak zel dan tur ngaihtuah a. Meeting chuan CAB chu kan ram leh hnam tana himlo anih avangin dodalna kalpui zel nise tiin CAB chu pawl pakhat emaw, Political Party malin do hneh mai theih a nilo a, Party anga thangthat lak tumna emaw, party inchirhthehna hmang lo turin Mizoram chhunga Political Party hrang hrangte a ngen nawn leh a. Political Party hrang hrang, NGO hrang hrang leh Mizo mipuite hian kan theihna zawn theuhah CAB hi na takin kan dodal a ni tih pawh inpawm tlang tura Mizo mipui zawng zawng ngenin, North East mipuite pawh lungrual taka ke pen a, Mizoram chhung leh pawna Zofate zawng zawng pawh thinlung hmun khat pu-a kan hnam tana tangho tlat turin Zofate a sawm nawn leh bawk.

MZP chuan India Parliament Lok Sabha-ah December ni 9, 2019 leh Rajya Sabha-ah December ni 10, 2019 a CAB pass tumna Bill pharh a ni leh tur chu pawi an tih thu pawh an sawi bawk.