Literacy rate sang tak nei siin hnathawk thei thalai kan tlem hi a vei awm - H&TE Minister

Higher and Technical Education Minister, Dr. R. Lalthangliana chuan Literacy rate sang tak nei si a hnathawk thei thalai kan tlem chu veiawm a tih thu a sawi.
Rashtriya Uchchatar Shiksha Abiyan (RUSA) hnuaia Assistant Professor lak thar te tana 'One Day Induction Meeting of Assistant Professor (RUSA)' nimin a Directorate of Economics & Statistics Conference Hall, Aizawl a neih ah he thu hi sawiin Higher and Technical Education Minister, Dr. R. Lalthangliana chuan zirtirtute chuan tunge an nih leh enge an mawhphurhna tih an hriatchian a tul thu sawiin, “Naupangte hi hmangaihna tak tak nena enkawla zirtir an nih chuan ram hmasawnna siamtu an ni thei a ni,” a ti a. Amah pawh zirtirtu anih ve thin thu sawiin zirtirtu kalkhawmte chu an hnathawha tui turin a chah a, “Khawi College-ah pawh thawk ila, kan zirlaite hi IAS, MCS, Doctor, Central Service leh hna dang tha leh sang tak takah an tling thei a ni tih hre chungin kan zirtir tur a ni,” a ti.
Quality Education a ngaihpawimawh thu sawiin Dr. R. Lalthangliana chuan, “Literacy rate sang tak nei siin hnathawk thei thalai kan tlem hi a vei awm. Zirlai tha tak tak chher chhuak ila, hna chuan a rawn zawng zawk mai dawn a ni,” a ti a. Vawiin-a zirlaite hi Mizoram hmathlir an nih thu sawiin, an hringnuna hun pawimawh lai ber hmang mekin kaihruaitu tha an mamawh hunlai ber anih thu a sawi a, Zirtirtute chu zirlaite nena inpawhna tha tak nei turin a chah bawk. Posting chungchangah a titha-te ringawt Aizawl-ah an awm thei lo tih sawiin, “Thingtlang lama College-te pawhin zirna tha dawn an duh a, chuvangin tuna posting pawh hi a rualkhai thei ang bera siam a ni,” a ti a, Zirtirtute chu sawrkarin a mamawhna hun leh hmun ang zela insiamrem thiam turin a chah bawk.
He Induction Meeting hi H&TE-a Commissioner & Secretary leh RUSA-a State Project Director, Biaktluanga IAS chuan kaihruaiin Zirlaite mi tangkai leh puitling taka chherchhuak tur chuan lehkhabu chhung thu hriat bakah kawng engkima hmasawna zirlaiten an neih theih nan tunlai mil zela zirtirtute chu insiamrem thiam a pawimawh thu a sawi a. Ramhmangaiha, Joint Director (Admin), Higher and Technical Education Department chuan Code of Professional Ethics chungchang sawiin Lallianzuala, Joint Director (QAC), Higher and Technical Education Department chuan Quality Education chungchang a sawi bawk.

Comments

Chhiar Hlawhte