Chief Minister in Prime Minister leh Union Minister pawimawh dang te a kawm

New Delhi a cham mek Chief Minister, Zoramthanga chuan nimin khan Prime Minister, Narendra Modi chu a pisa-ah a kawmin Mizoram mamawh hrang hrang a sawipui a. Hei bakah hian Minister hrang hrangte kawmin Mizoram mamawh hrang hrangte a sawipui bawk.

Nimin a Prime Minister a kawmna ah hian Chief Minister, Zoramthanga chuan Mizoram in All India Service Cadre hran kan neih tul a tih thu sawiin, hei hian nasa takin State sawrkar hnathawh tichakin a tih awlsam dawn tur thu a sawipui a. Kumin March thlaa Assembly-in a pass tawh The Mizoram Maintenance of Household Register Bill, 2019, tun thlenga Mizoram Governor pawmpuina la hmuh loh chu tihfel thuai a nih theih nan Prime Minister chu hmalakpui turin a ngen bawk a. Hei hian dan leh thupek kenkawh chungchang leh ramchhung venhimna ah nasa taka a puih a beisei thu a sawi bawk. Hei bakah hian Chief Minister chuan Ministry of DoNER leh NEC atanga hmarchhak state te sum hmuh chu a beitham hle tih pawh sawiin, hei hi tihpun a tul thu Prime Minister hi a hrilh a. Zoram Medical College (ZMC) chu AlIMS zulzuia Medical College-cum-Hospital-a siam a tul thu a sawi bawk. Hospital changtlung zawk kan neih chuan Zoram mipuite mai bakah a chhehvel State thlengin nasa takin an chhawr dawn a ni, a ti bawk. Prime Minister chuan heng thil te hi a kaihhnawih Ministry te nen an lo enho tur thu a hrilh a ni.

Nimin  vek khan Chief Minister hian Union Finance Minister, Nirmala Sitharaman-i chu a pisaah a kawmin, JICA leh ram pawn lam Agency hnuai atanga Mizoram tana sum tam zawk hmuh theih dan tur a sawipui a. Mizorama kawngpui thenkhat chu JICA sum hmanga siam a rawt a. India hmarchhak bial tana Ministry of DoNER leh NEC-a sum tam zawk dah chungchang a sawipui bawk.

Ministry of Civil Aviation leh Urban Development changtu Union Minister, Hardeep Singh Puri pawh Chief Minister hian a Pisa-ah kawmin Aizawl - Delhi direct-a thlawhna service tir dan chungchang leh Aizawl khawpui bakah Mizoram khawpui dangte tihhmasawn dan tura rawtna hrang hrangte a sawipui a ni.

Hemi hma niminpiah tlai khan Railways leh Commerce & Industry Minister, Piyush Goyal pawh a pisa-ah kawmin Bairabi atanga Sairang thleng tur Rel kawng siam mek chu tihpuitlin thuai a tul thu a thlen a, Union Minister chuan kum 2022-ah chuan zawh hman ngei tum a nih thu a sawi a. Chak zawka hnathawh a nih theih nan Rel kawng siam hna thawktute leh state sawrkar chu ngun zawka inhmukhawm thin turin leh harsatna awm theite pawh sawiho thin turin a chah bawk.

Hei bakah hian Zokhawthar Land Custom Station chu thuamthat a tul thu leh |iau lui-a Bailey Bridge chu RCC bridge a thlak a tul thu Chief Minister chuan sawiin, Land Custom Station chu Kawrpuichhuah (Tlabung) leh Zorinpui-ah changtlung tak din a tul thu Union Minister hi a hrilh bawk a, Mizoram-a bungraw lakluh leh thawnchhuah nasa takin a tiawlsam phah tur thu te sawidunin Union Minister chuan Chief Minister, Zoramthanga thu thlen te chu sawrkar laipui pawhin a ngaihpawimawh thu leh a lo bawhzui zel tur thu a hrilh a ni. Heng Minister hrang hrang a kawmna ah hian Chief Minister hi sawrkar hotu ten an tawiawm a ni.