Tuialhthei khuahkhirh mek

Mizoram puma tuialhthei harsatna thleng mek ah Serchhip-ah pawh Petrol leh Diesel pek-chhuah dan khuahkhirh mek a ni.

Tunhnaiah Mizoram tana tuialhthei lakluh kawngah harsatna a awm avangin Mizoram hmun hrang hrangah tuialhthei a harsa mek a, Serchhip-ah pawh Petrol Pump awmchhun, PB. Lalzuithanga Filling Station, IOC Veng-a Petrol leh Diesel pekchhuah dan khuahkhirh mek a ni a, Petrol Pump nghaktute chuan nimin khan Petrol hi litre 1000 vel an la neih thu sawiin, sawrkar hotu lam atanga phalna nei te hnenah erawh an pekchhuah thu an sawi a, phalna pekchhuah danah hian bithliah a awm loh thu leh an mamawh dan ang zela pekchhuah nia an hriat thu an sawi a, tunah hian an Motor pakhat chu load lak tuma a awm mek thu leh nimin lamah load an lak theihloh pawhin Vawiin lamah chuan an lak theih tawh an beisei thu an sawi.

Hetihlai hian Diesel erawh tun dinhmun ah an ngah thu leh motor pakhat rawn thleng mai tur pawh a awm thu sawiin, amaherawh chu sawrkar lama hotu ten pekchhuah dan an bithliah avanga duh duh zat erawh lak theih a nih loh thu an sawi bawk.