Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Andaman Thliarkar-ah

Andaman Thliarkar-ah

- Zonuna Kawlni, Editor LENKAWL

India rama State leh UT hmasawn tawh zawk ten kawng hrang hranga hma an sawn dan thuthar thehdarhtu ten an zirchianna turin Mizoram sawrkar chuan Information & Public Relations Department kaltlangin Press Study Tour a buatsaih thin a. Tun thla ni 9-15 chhung khan MJA member mi 9 te tan Andaman & Nicobar Island-ah Press Study Tour hi neih leh niin tun tumah hian vanneihthlak takin hruaitute leh thawhpuite duhsakna azarah zuk kalin Andaman Thliarkar chu ka zuk hmu ve a. Tun tuma kal te hi MJA General Hqrs. atangin MJA-a Vice President, Lalremsiama leh Secretary, Joseph Lalnuntluanga te chuan min hovin Aizawl atangin mi 5 bakah Lawngtlai, Lunglei, Kolasib leh Serchhip atangin mi pakhat theuh kan kal a, heng MJA Member te hi I&PR Director, Lallianpuii leh Joint Director, C. Lalnunkima bakah Public Relations Officer, Pratap Chhetri te chuan min kaihruai a ni.
Tun tuma Press Study Tour-a kal te hian Dec. 9, 2019 khan Aizawl-a I&PR Director Room-ah kan kal dan tur inhrilhhriatna neiin hemi hnu hian Motor 4 hmangin Lengpui Airport kan pan a, Lengpui atang hian Kolkata-ah riak thlain a tuk-ah Port Blair kan thlawk lut a, hetah hian Andaman Administration, Information, Publicity & Tourism a Editor, Biju Nair leh a thawhpuiten Airport-ah min lo hmuakin kan thlenna tur, Circuit House, South Point-ah min dah nghal a, Biju Nair hian kan zin chhung zawng min vilin kan vahna tur zawng zawng min ngaihtuah pui bawk a, ani zarah hian thil tam tak kan hriat phah bawk a ni.
Kan thlen ni hian Port Blair khawpui chhung hmun hrang hrangte fangin an khawsak phung tlangpui kan theih ang angin kan zir a, a tualchhuak thil hrang hrang an zawrhna hmun leh kawtthler hrang hrangte tlawhin zan thlengin hun kan hmang nghal a ni.
A tuk December 11, 2019-ah Port Blair atanga hla lo te, Ross Island, Netaji Subhash Chandra Bose Dweep tih tak chu tlawhin chawhma lam hun kan hmang a, Ross Island hi British in Andaman thliarkar an awp tanna hmun, Indopui II-na a Japan in a beih niin khawpui hmun hlui chu an beih hnua a chhiat ang anga vawnthat niin kan tlawh lai pawh hian tlawhtu an thahnem hle a, helai hmunah hian Electric hmang Motor hmanga tlankualin min kaihruaitu ten an hmunhma te min hrilhfiah zel a, a hmunhma a nuamin an khawpui indin dan pawh a phuisuiin a changkang hle tih a hriat theih a, ‘Paris of East’ tih hiala koh niin he khawpui chanchin tarlanna atana siam Museum te pawh kan tlawh bawk a ni.
Hemi hnu hian Tan In hmingthang leh ropui, Cellular Jail chu a hmunah kan tlawh leh a, Cellular Jail hi British in India an awp laia Tan In rapthlak leh zalenna sualtu te tihduhdahna leh khaihlum hial an nihna hmun niin he Jail hi a chanchin pawh sawi tham fe a ni a. He Tan In hi kum 1896-a sak tan niin kum 1906-ah sak zawh a ni a, a tirah chuan Thlur 7 niin a lai-ah a intawkkhawm a, a intawhkhawmna lai tak hi Tan In vengtu awmna hmun a ni nghal bawk a, chhawng thum-a sang niin Jail pindan (Cell) 696 a awm a, Cell khat hi a dung ft. 14.8 leh a vang ft. 8.9 a zau a ni a, amaherawh chu tunah hian thlur 3 chauh awm tawhin a vai hian leirawhchan (Brick) chang tha tak hmanga sak a ni a, National Memorial Monument-ah puangin uluk taka enkawl a ni a. Zan lamah helai hmunah bawk hian Sound and Light Show neih thin niin hemi zan hian kan chhim bawk a, he tan In enkawl dan leh mi tang ten nghaisak leh diriam an hlawh dan hrang hrang te eng leh ri hmanga entir niin a hlawkthlak hle bawk a ni.
Hemi Ni chawhnu lam hian Information Publicity & Tourism Andaman & Nicobar Administration hotute leh chanchinbu mite nen inkawmhona kan nei bawk a, an dinhmun leh hnathawh dan hrang hrang te min hrilhfiah a, Andaman-ah hian an Media hi sawrkar enkawl niin keini State-a PIB hnathawh ang deuh hian hna an thawk a ni. Zan lamah Jogger's Park kan tlawh bawk a ni.
A tuk December 12, 2019 chawhma lamah Asia khawmualpui-a thingzai factory lian ber leh upa ber, Chatham Saw Mill kan tlawh leh a, Chatham Saw Mill hi kum 1883-a din niin Chatham thliarkar-a awm a ni a, amaherawh chu Lei dawhkai mai theiha inhnaih a nih avangin Lei tha tak dawhkai a ni a, an hnathawh dan hrang hrang te Forest Department-a thawktu ten min hrilhfiah a, helai hmunah hian Aizawl Dawrpui Vengthar pa, Liankima Lailung IFS chu Addl. PCCF hna thawka lo awmin an kalphung leh hnathawh dan te min hrilhfiah bawk a. Helai hmun a thing an zai te hi rampawn atanga an lakluh deuh vek niin mipui ten an duh ang zela thing hi zai thin a ni a, mipuite hnenah hralhchhuah thin a ni a. Helai hmunah hian Museum tha tak siam niin heng te pawh hi kan tlawh nghal bawk a ni.
Hemi hnu hian Indian Navy te Musuem, tuipui nungcha hrang hrang te dahna leh Andaman-a cheng mi hrang hrangte khawsak dan tarlanna hmun – Samudrika Marine Museum leh Andaman thliarkar a cheng hnam tlem te, tumah tlawh phal loh te chanchin pholanna hmun, Zonal Anthropological Museum te pawh kan tlawh bawk a, mit a tlai hle a ni.
Chawhnu lamah Andaman & Nicobar Administration-a Chief Secretary, Chetan B. Sanghi chu a Pisa-ah kan kawm bawk a, ani hi Aizawl DC hna pawh lo chelh tawh niin kan hun hman dan te sawihoin inkawmna hun tha tak kan nei a, hemi hnu hian Tuipui kam-ah lengin leilung hausakna atanga an thil siam chi hrang hrangte an zawrhchhuah chu kan lei hlawm bawk a ni.
A tuk, December 13-ah Andaman thliarkar-a Tourism Circuit zinga khualzin te hip ber hmun nia sawi, Havelock Island, Swaraj Dweep tia vuah chu kan tlawh leh bawk a, helai hmun hi Port Blair atanga Lawng hmanga darkar 2 zet kal ngai niin hmun hrang hrang kan tlawhkual a, a then Beach-ah lengin a then Tuichhung luhna-ah an kal a, nileng-a hun hmangin chawhnu lamah Port Blair-ah bawk kan kir leh a. A tuk December 14-ah Kolkata panin Kolkata-ah hian zankhat riakin December 15 khan tluang takin Aizawl kan rawn thleng leh a ni.
Andaman khawpui, Port Blair hi Tuipui kam mai-a awm niin sik leh sa ah pawh a nawm vanglai tak a ni a, International Airport neiin tlawhtu pawh an tam thin hle tih a hriat theih a. Lawng leh Thlawhtheihna hmanga bungrua engkim mai lakluh an ngai chung pawhin an kawngpui a thain thingtlang zawk kan tlawhna ah te pawh kawngpui an nei tha tlangpui a. Faina lamah hma an la nasa tih hmuh theih niin an khawpui pawh an chei nasa hle a, kawngpui sir mai-ah thlalakpui atana itawm fe fe a tamin khualzin te tan tlawh manhla tak a ni hlawm bawk.
Hei bakah hian Jogger's Park kan tlawh-ah hian taksa sawizawina hrang hrang dah niin hei hi a duh apiang ten panin taksa an sawizawi thin a, hei mai bakah hian ‘Vantlang Gym’ kan tih mai pawh hmun thenkhat ah chuan dah a ni bawk a, hei hi sum tlemte hmanga kan din ve theih niin a lang a, kan sawrkar in ‘Fit Mizoram Movement’ a kalpui mek atan pawh thil tangkai tak tur leh thalai tam tak, taksa sawizawi mamawh em em te tan pawh thil tangkai tak a nih ngei a rinawm bawk a ni.
Andaman hi Union Territory niin mipui thlan sawrkar erawh a dinglo thung a, hei vang hian Lt. Governor leh Chief Secretary te enkawl ber ah ngaih theih niin Port Blair hi Municipal Council in an enkawl thung a, a mipui nawlpui khawsak phung a changkang viau a. Port Blair-ah hian In reng reng chhawng li (4) aia sang-a sak khap niin hei hian an khawpui thlir a ti nuam hle a. Hei bakah hian chenna In hi inhnaih tak tak ah awm lovin khawpui chhungah hian  thingkung thahnem tak a awm bawk a, khawpui boruak a ti nuam hle a ni.
Chawlhkar khat thanga zin ni mah ila hmun pawimawh hrang hrang kan tlawh hnem hle a, hmun pakhat kan tlawhna pawh hi chanchin thui tak nei te an nih avangin tun tumah chuan ziah vek sen a ni lo ang. Tun atan chuan hei zawng hi nise, harsatna leh buaina awm lova kan zin chhunga min vengtu Pathian leh min kaihruaitute bakah MJA atanga ka zinpui zawng zawngte chungah lawmthu ka sawi mawlh mawlh e.

Comments

Popular News (Last 30 Days)