Home Guards & Civil Defence Raising Day lawm

Home Guards & Civil Defence Raising Day vawi 57-na chu nimin khan Sesawng-a Central Training Institute (CTI)-ah lawm a ni a, Home Minister, Lalchamliana chuan khuallian niin a hmanpui.

Home Guards & Civil Defence Raising Day lawmna hunah hian Home Minister chuan India ram leh Mizorama Home Guards & Civil Defence thanchhoh dan tlangpui sawilangin, Home Guard leh Civil Defence te chu sipai tak tak anga a kul a tai a ram venhimna hna thawk tura din ni lem lo mahse mahni inpe a, ramchhung venhim hna thawktu sipai te a tul anga thlawp leh mipui vantlang rawngbawla theihtawp chhuah thin an nih thu a sawi a. “MRHG&CD thupui 'Nishkam Seva', Mizo tawng-a 'Mahni inphata midangte tana nun' hi a ropui hle a, Home Guard volunteer te chauh ni lovin mitin hian nunpui theuh thei ila a duhawm hle a ni,” a ti.

Home Minister chuan MRHG & CD volunteer te chu Uniform ha an nih ang ngeiin discipline tha taka vawn chu an nihna in a ken tel tlat a nih thu leh Uniform hak chuan inlulinna ni lovin mipui rawngbawl tura mawhphurhna lian tak a pe tih hi hre thar leh thin turin a chah bawk.

All India Home Guard & Civil Defence Raising Day hi December ni 6, 1962 a ni a. Mizoram-ah chuan kum 1964 March thla ah din niin kum 1966-a Zoram buai vangin engemaw chen tihtawp a ni a. Sawrkar Laipui ruahmanna in December ni 6, 1971 khan din that leh a ni a. A tirah Assam Home Guard hnuaiah awmin kum 1973 March thla atang 'Mizoram Home Guards' ti a vuah a ni a. Tunah hian thawktu Ministerial Staff leh Non-Ministerial staff 158 awmin Mizoram Home Guard Volunteers strength hi 1168 a ni a. Hmeichhe Home Guard tan 5% hauh sak thin chu tunhnai khan 12% a tihpun a ni leh bawk a ni.