Baktawng khua ah awlsam leh thianghlim zawka Balhla um-na tur, Ripening Chamber hawn a ni

Kuthnathawktute tharchhuah Balhla te tuihnai, hrisel leh awlsam zawka um hminna tur hmun, Ripening Chamber chu nimin khan Mizoram sawrkar-a Horticulture Development Board Vice Chairman, Prof. F. Lalnunmawia MLA chuan Baktawng-ah a hawng.

Ripening Chambers hawnna hun Baktawng Community Hall-a neih ah Horticulture Development Board Vice Chairman, Prof. F. Lalnunmawia chuan Mizoram-ah Baktawng leh Khumtung khua chu Balhla tharchhuak hnem ber ber an nih thu sawiin, Balhla chingtuten an khawl thar chu tangkai leh hlawk taka an hman a duh thu leh hetiang khawl an nei chu a lawmpui thu a sawi a. Mizoram sawrkar Flagship Programme, SDEP hnuaiah Pawl leh Society te tan hmalakna tur tam tak duan anih pawh sawiin, Mizoram-ah sum tam tak senga siam khawl manto tak tak hluihlawn a ni thin chu pawi a tih thu a sawi a. Baktawng khua-a Balhla chingtu Inzawmkhawm Pawl te chu an khawl neih thar enkawl zui leh hman tangkai zelna kawngah theihtawp chhuah chhunzawm tura fuihin, Balhla chingtute chuan an sum lakluhna kawngah pawh hlawk taka an hman ngei a beisei thu a sawi bawk.

Horticulture Department Joint Director, H. Manthanga kaihhruai he hunah hian Serchhip DHO, M. Vanlalzami chuan he khawl siamna kawnga hma an lak dan sawiin Baktawng khua leh a chhehvela Balhla chingtuten an Balhla tharchhuah te um hminna kawngah hunrei tak chhung harsatna an lo neih tawh chu Department lamin a hriatpui thu te, he khawl tharah hi chuan hrisel tak leh tuihnai leh rang zawkin Balhla mai nilo, thlai dang a um hmin zung zung theih tawh dawn thu a sawi a. Ripening Chamber-ah hian Room/Chamber 4 awmin Room chhungah hian thlairah ti hmintu Ethylene Gas chu Temparature uluk taka set anih hnuah kahluh niin, chu chuan ni 4 chhungin Balhla 80 Quintals a um hmin theih dawn a, hei hi Baktawng leh a chhehvel a Balhla chingtute tan a hlu dawn hle tih a sawi bawk.

He hunah hian Horticulture Department Director, Dr. Elizabeth Saipari pawhin Balhla chingtuten an Balhla um hminna tura hmanraw dang an hman thin Calcium Carbyte hmanga um hmin te chuan Mihring taksa hriselna atana thalo, Arcelic leh Phosporate a ken tel theih thu leh he khawl thar-a hman tur, Ethylene Gas erawh boruak-ah a thamral zel thung avangin mihring hriselna atan a that em em zawk thu sawi bawk.

Ripening Chamber hi cheng nuai 25 senga siam niin Horticulture Development Committee, Baktawng hruaitute hnenah hlan nghal a ni.