Serchhip District-a Damdawi In leh zirna In-ah kawlphetha hmang tlem chi bungrua sem a ni

Mizoram sawrkar P&E Department-a State Designated Agency for Energy Conservation, Chief Electrical Inspectorate buatsaihin nimin khan Serchhip District-a Damdawi In leh Zirna In thlanchhuah ah te kawlphetha hmang tlem chi bungraw chi hrang hrang semchhuah a ni.

Kawlphetha hmang tlem chi bungrua hi Sawrkar damdawi In leh Sawrkar School-ah te semchhuah tura ruahman niin Serchhip District a damdawi In zingah District Hospital-ah hlan niin hemi puala Inkhawm tawi OPD building-a neih chu Laldawngliana, EE Chief Electrical Inspectorate chuan a kaihruai a, he hunah hian Vansangliana, Project Coordinator chuan he hmalakna an kalpui dan a sawi a. India rama kawlphetha kan hman zaa 75 vel chu lungalhthei atanga siam a nih thu leh heng lungalhthei te hi ral thei a nih avangin kan neih ang ang kan renchem a tul thu a sawi a. Mizoram-ah pawh kawlphetha MW 100 vel mamawh ang kan nih thu sawiin, kan siamchhuah erawh MW 10 pawh tlinglo te a nih avangin kan neih ang ang te kan renchem a tul thu a sawi bawk.

He hunah hian Serchhip District Hospital-a District Medical Superintendent, Dr. ZD. Lalmuanawma chuan Serchhip Damdawi In in kawlphetha an hman nasat thu sawiin, Solar Light hman theihna tura khawl bun chu an hman theihloh thu leh Generator an neih chu Diesel a heh avanga harsatna an tawh thu te a sawi a. Chutiang kara kawlphetha renchemna remchang tak siam sak an ni chu lawmawm an tih thu a sawi bawk.

Serchhip District Hospital tan hian LED Bulb 62, LED Tube Light 93, Ceiling Fan 50 leh LED Street Lights 10 niin a vai hian Rs. 236,070/- hu vela chhut a ni.

Hemi hnu niin chawhnu lam khan Serchhip District chhunga School thlanchhuahte tan kawlphetha renchem a pawimawh zia inzirtirna leh Bureau of Energy Efficiency (BEE) hnuaia hmanraw semchhuahna hun hman zui leh a ni a. Serchhip I&PR Conference Hall-a he hun hman hi H. Zonunsanga SE Chief Electrical Inspectorate chuan kaihhruaiin Vansangliana, Project Coordinator chuan Serchhip District chhunga zirna In thlanchhuah 30 atanga kalkhawm zirtirtu chu kawlphetha renchem a pawimawh zia a zirtir a, hemi hnu hian heng zirna In thlanchhuah te hnenah hian Laldawngliana, EE chuan kawlphetha renchemna tura hmanraw hrang hrang a hlan a, heng zirna In te hnenah hian LED Bulb 138, LED Tube Light 99 leh Ceiling Fan 70 semchhuah niin a vaiin Rs. 251,530/- hu a chhut a ni a, Vawiin Serchhip District chhung Damdawi In leh Zirna In a bungrua an semchhuah hi 487,600/- hu nia chhut a ni.