Bru hruaikir hna tihtawp niin chhungkaw 289 atangin mi 1165 hruaikir an ni

Tripura Camp hrang hrang atanga Bru hruaikir hna thawh vawi 9-na chu Inrinni khan ruahman lawk angin tihtawp a ni ta a, Bru hruaikir hna thawk tura sawrkar mi pawimawh kal te leh Bru hruaikirna tura Motor chhawp te pawh Inrinni khan an awmna hmun atangin an kir leh a ni.
Kanhmun leh Tripura Relief Camp-a Bru hruaikir hna thawk tura awm mekte chuan Inrinni chawhnu lam khan an thawhna District hmunpui - Mamit, Kolasib leh Lunglei te an pan a, Bru hruaikir hna thawh chhung hian Bru chhungkaw 289-a mi 1,165 an lokir a, an zinga mi 704 te chu puitling an ni a, 461 chu naupang an ni a. Mi 814 te hi Mamit District-ah inbenbeltir an ni anga, mi 269 chu Lunglei District-ah leh mi 82 chu Kolasib District-ah an inbengbel dawn a ni.
Home Department-a OSD leh Deputy Secretary, David H. Lalthangliana chuan Zirtawpni khan Ministry of Home Affairs-a Joint Secretary (North East), Satyendra Garg hnenah lehkha thawnin November ni 30, 2019 chawhnu lam atangin Kanhmun khua leh Tripura Relief Camp atanga Mizoram Official-te leh man chawi-a an lirthei hmante chu hnuhkir an nih tur thu a hriattir a. November ni 8-a Mizoram Council of Ministers thukhawmin Bru hruaikir hna hi November ni 30 hnu lamah chuan kalpui tawh loh tura thutlukna a siam zulzuiin hetiang hian tih a ni ta a ni, a ti.
Mizoram Sawrkar chuan Bru hruaikir hnathawktute chu man chawi-a an lirthei hmante chu nimin khan a neitute hnena hlan fel vek turin a ti a, Bru lokirte enkawl zui tura ruat Administrative Officer-te chu an bial chhung theuhva Bru chhungkaw lokirte sum leh buhfai pek dan leh In an sak dante uluk taka vila an dawng ngei a ni tih chian reng turin a hriattir a. District pathum-a SP-te chu Bru lokir inbengbelte venhimna hna tha taka thawk tura hriattir an nih rualin CMO-te pawh Bru lokirte hriselna tha leh uluk taka vil zui turin a hriattir bawk.
Mizoram sawrkar Official-te hian October ni 3, 2019 atang khan Bru hruaikir hna hi an thawk tan a. Bru chhungkaw 4,447 hruai kir tur a nih laiin chhungkaw 300 pawh tling lo hruaikir an ni a, a chhan ber chu Relief Camp-a awm Bru tam zawk ten Mizoram lama lokir duh lova Tripura a awm ngheh an duh zawk vang niin a lang a. Chu chu an hruaitute'n tanlakna remchangah an hmang niin a lang bawk a. Kawngpui dangin Relief Camp-a kal tum Mizoram Official-te pawh an dang a, an kir duhloh thu hi lehkhate pawh tarin an aurual bawk thin. Lokir duhte pawhin kir loh duhtute mitmei an veng a, engemawzat chu anmahni thu-in a ruk a ral deuhvin an lokir ni a thudawn a ni.

Comments

Chhiar Hlawhte