Pi pu zai thluk-a Hla inphuahsiakna neih a ni

Mizo Pi pu zai (tlar thum zai) thluka Pathian Fakna hla inphuah-siak lawmman semna hun chu nimin khan Art and Culture Department buatsaihin Vanapa Hall, Aizawl-ah neih a ni.

He lawmman semna hun hi Art & Culture Minister, R.Lalzirliana chuan hmanpuiin pi pu zai thluka Pathian fakna hla inphuahsiak, a vawikhatna atana Mizorama buatsaih a ni chu lawmawm a tih thu sawiin, hla 153 zet thehluh a ni chu kan Hnam ziarang kan ngaihhlutzia tilangtu a ni, a ti a. Mizo rilrem zawng tak, sak leh lampui nuam em em pi pu zai thluka Pathian fakna hla phuah tharte hi Biak In-ah lakluh ni a la awm ang a, a la hlu hle dawn a ni, a ti.

Pi pu zai (tlar thum zai) thluka Pathian Fakna hla inphuahsiak ah hian mi pakhatin hla pakhat zel thehluh theih niin October ni 18, 2019 thleng khan hun hawn a ni. Hla thehluttu hi mi 153, mipa 119 leh hmeichhia 44 an ni a. Aizawl khaw pawn atangin mi 51 an tel. Zaithluk chi nga Domangi Zai, Laldanga Awi Awi, Hrangchhawni Zai, Suakpuivungi Ruah Varpui Bangtheh leh Darmani Zai hmangin hla inphuahsiak hi buatsaih a ni a. Domangi Zai thluk hla 36, Hrangchhawni Zai thluk hla 22, Laldanga Awi Awi thluk hla 51, Suakpuivungi Ruah Varpui Bangtheh thluk hla 17 leh Darmani Zai thluk hla 26 a lut a. L.T Hauhnar, Chhiahtlang Hmar Veng chuan lawmman pakhatna dawngin R.Lalrochhara, Keifang in lawmman pahnihna leh RC. Kungpuii, Armed Veng in lawmman pathumna a dawng bawk.