Winter Festival hmang

Mizoram sawrkar-a Tourism Department buatsaihin nimin khan Aizawl Sipai Lammual ah Winter Festival neih a ni a, Deputy Chief Minister, Tawnluia chuan khuallian niin a hman-pui a ni.
Winter Festival hawnna ah hian Deputy Chief Minister, Tawnluia chuan rem hre taka kan sakhuana nen inmil si a Kut hman dan rua-hman a ni chu a lawmawm a tih thu sawiin, Mizoram chu khualzin tam zawkin an tlawh theih turin sawrkarin hma a la a, mipuite pawhin pawn lam atanga Mizoram rawn tlawh khual-zinte tha taka lo dawngsawng thin tura kan rilru leh nunphungte pawh kan inbuatsaih ve a pawimawh thu a sawi a. Sawrkarin thalaite hmasawnna tur ngaihpawimawhin kawng hrang hrangin hma a la tih pawh sawiin, policy mumal tak neiin ruahmanna a siam chho mek zel a nih thu leh thalaite tan eizawnna tha leh rintlak siam turin theihtawp chhuah mek a nih thu a sawi bawk.
He hunah hian khual zahawm Tourism Minister, Robert Romawia Royte pawhin Winter Festival chu Christmas lam hawia mipuite thinlung buatsaihna atana neih a nih thu leh kan hma lawka Lal Isua piancham lo thleng tur kan lawmna turah hnamdang leh ramdang mite hip leh hman ve chakawm khawpa hun hman tul a tih thu a sawi a. Kumin hi Winter Festival hman vawikhatna a nih thu leh, kumdang ah pawh uar tak leh inbuatsaihna tha zawk nena hman tum a nih thu sawiin, Winter Festival hmangtu leh Mizo mipuite Christmas leh Kumthar hlim taka hmang turin duhsakna a hlan bawk.
Winter Festival hawnna inkhawm ah hian Mizoram Chief Secretary, Lalnunmawia Chuaungo-in inlawmna thu a sawi a, Food Stalls 12, Handloom & Handicraft Stalls 3, Carnival Stalls 18 leh Photo Booth 2 a awm a ni.

Comments

Chhiar Hlawhte