Mizoram State Health Care Scheme kalpui dan thlirin MSHCS rate zawm theilo te Empanneled suspend a ni

Mizoram sawrkar-a Health & Family Welfare Board chu nimin khan thukhawmin ‘Mizoram State Health Care Scheme, 2019’ kalpui a nih dan leh dinhmun te an thlirho a. Mizoram sawrkar chuan MSHCS zawm theilo damdawi In te chu Empanelled Hospital an nihna atanga suspend an nih tur thu nimin khan thupek a chhuah bawk.

Mizoram sawrkar flagship programme, SEDP hnuaia din Health & Family Welfare Board thutkhawm Secretariat Conference Hall, MINECO-a neih hi Board Chairman leh Health Minister, Dr. R. Lalthangliana chuan kaihruaiin Dr. R. Lalthangliana chuan Mizoram State Health Care Scheme chu mipuite tan leh damdawi In lam tan pawha harsatna thlenlo thei ang ber tura uluk taka ruahman a ni, a ti a. AIDS vanga kan ramin harsatna a tawh chu mi zawng zawngin kan do let a tul thu leh hemi atana School, College leh University zirlaite, Kohhran hrang hrangte, Zirlai pawl te leh Tlawmngai pawl hrang hrangte thlawpna an hmu tha chuan hma kan sawnpui ngei ang tih a rin tir thu a sawi a. Damdawi In hrang hrang leh Health Centre hrang hrangte tihchangtlunna turin World Bank nen thawhho tum a nih thu leh inbiakna pawh awmze nei taka kalpui mek a nih thu a sawi bawk.

He hunah hian Health & Family Welfare Board Vice Chairman, Dr. Z.R. Thiamsanga MLA pawhin Private leh Mission Hospital thenkhat, MSHCS la zawm ve theilo te chu a thalo lai te ennawn theih reng a nih a vangin tun dinhmunah zawm ve phawt turin a ngen a. SEDP hnuaia Board hrang hrangte hnathawh dan tur leh kalphung tur sawrkarin a ruahman chu zirho a ni bawk.

Nimin-a Health & Family Welfare Board thutkhawm ah hian kumin October ni 1 atanga hman tan Mizoram State Health Care Scheme, 2019 kalpui a nih dan leh dinhmun te an thlirho a, Mizoram State Health Care Society Governing Board ruahmanna in AB-PMJAY leh Mizoram State Health Care Scheme, 2019 kal-kawp (convergence) tir tura ruahmanna kalpui mek a nih thu sawilan niin, a taka kalpui a nih hunah chuan AB-PMJAY rate in damlo inenkawlna senso do phalo mahse Mizoram State Health Care Scheme notified rate in a khaichhuak thei tura beisei a ni.

Mizoram State Health Care Scheme hnuaia inziahluh hun khar tawh pawh tunah hian hawn that leh a nih thu tarlan a ni a, a inziaklut thei chin zawng zawng inziaklut vek tura an duh thu an sawi a. Private leh Mission Hospital te zinga Mizoram State Health Care Scheme zawm theilo an la awm chungchang pawh sawiho niin tun dinhmunah damdawi In 12 - Christian Hospital, Serkawn; Christian Hospital, Lawngtlai; Lairam Christian Medical Centre, Lawngtlai; Nazareth Nursing Home, Kolasib; Alpha Hospital, Aizawl; Med-Aim Adventist Hospital, Champhai; B.N. Hospital, Aizawl; Hope Hospital, Lunglei; Faith Hospital and Research Centre, Lunglei; J.C. Eye Hospital, Aizawl; Eye Care & Research Centre, Aizawl leh Nazareth Medi-Tech Diagnostic & Care Centre, Aizawl ten MSHCS an zawm tawh thu tarlan a ni.

Hetihlai hian Mizoram sawrkar chuan MSHCS zawm theilo damdawi In te chu Empanelled Hospital an nihna atanga suspend an nih tur thu nimin khan thupek a chhuah bawk a. Health Secretary, H. Lalengmawia chuan MHCS leh AB-PMJAY a rate hman mek chu Private dam-dawi In te nen an sawiho hnuah zawh tawk nia hriain tuna rate ang hi an bithliah ta niin a sawi a. “Rate chungchang hi Private damdawi In te nen vawi duailo kan sawiho a, awm tawk nia kan hriat ah kan bithliah ta a. Gazette a chhuah hnu, la hman hma hauha tih danglam leh nghal ngawt hi a dik lo a. Kan hmang phawt ang a, a tul angin la ennawn zel tur a ni,” a ti bawk.