Hunpui lo thleng turah Serchhip Police ten mipuite tan theihtawp chhuah an tum

Serchhip Police te chuan kan hma lawka hunpui lo thleng tur mipui ten hlim leh thlamuang taka an hman theih nan theihtawp chhuaha hmalak an tum thu an sawi a. Nimin atang khan lirthei document fello enfiah leh manchhuah hna pawh ngawrh taka thawh tan a ni.

Karleh maia Kristian te hunpui lo thleng tur Krismas leh a hnua Kumhlui thlahna leh Kumthar lawmna lo thleng tur chu Serchhip District mipui ten hlim leh thlamuang taka an hman theih nan Serchhip Police te chuan theihtawp chhuaha hmalak an tum thu an sawi a. Serchhip District chhung khaw hrang hrang vilna tura Beat System kalpui thar tur pawh hna thawkin a viltu turte pawhin nimin atanga ni thum chhungin a bialtu theuh ten an bial chhung tlawhchhuaka tlawmngai pawl aiawhte nen inkawmna te neia hna pawimawh hrang hrang thawk nghal tura tih an nih thu an sawi a. Hei bakah hian District Magistrate in Halpuah leh halmawi bakah naupang silai lem, a mu kapchhuak thei khapna thupek a chhuah pawh a theih anga bawhzuiin dawr thenkhat te pawh enfiah a nih thu an sawi a, tunhnaia Veng thenkhata halpuah hal thawm hriat tur awm pawh a theih anga bawhzui tur a nih thu leh hetianga Magistrate thupek bawhchhia a che te chu an hnena hriattir turin mipuite chu an ngen bawk.

Serchhip Police te chuan heng hunpui lo thleng tur ah hian mipuite himna atan chhun leh zan-ah Patrolling insiama khawpui chhung hmun hrang hrang fankual a nih dawn thu pawh sawiin, mipuite hnena ngenna an siam pawh an puan-chhuah nghal zel dawn thu an sawi bawk a. Lirthei chetsualna hrang hrang lakah mipuite an him theihna tur atan pawh theihtawp chhuaha hmalak an tum thu sawiin, kumdang-a ngaihhnathiamna tello-a lirthei enfiahna Hapta an kalpui thin chu kumin ah hi chuan a Hapta bik hmang lovin lirthei document fel leh fello enfiah hna hi ngawrh taka an thawh dawn thu an sawi a. Nimin lamah Auto Rickshaw te enfiah hmasak bik niin hetiang hian lirthei chi hrang hrangte chu enfiah chhoh zel an nih dawn thu leh Dan bawhchhia manchhuah te chu a tul anga hremna pawh an pek zel dawn thu an sawi bawk.