Mizoram khawpui 5-ah LPG Home Delivery 100% niin PMUY hnuaiah LPG Connection dilna hawn mek a ni

FCS&CA Minister B. Lalchhanzova chuan Mizoram-a LPG Home Delivery kalpui mekah Aizawl Municipal Area bakah District Hqrs. zingah Serchhip, Hnahthial, Khawzawl leh Mamit Town-a te zaa za kalpui a nih tawh thu a sawi a, PMUY hnuaiah a thlawna LPG Connection dilna kalpui leh mek a nih thu a sawi bawk.

Nimin-a a Pisa-a thuthar thehdarhtute a kawmna ah Food, Civil Supplies & Consumers Affairs Minister B. Lalchhanzova chuan Mizoram Dustrict khawpui tina LPG Home Delivery kalpui mek chungchang sawiin, tunah hian Aizawl AMC Area bakah Serchhip Town, Hnahthial Town, Khawzawl Town leh Mamit Town-ah te LPG Home Delivery hi 100% kalpui a nih tawh thu sawiin, “District Hqrs. dang zawngah pawh bul tan a ni ve tawh bawk a. Heng District Hqrs. dangah te hian March, 2026 atang chuan 100% a kalpui ve theih turin Department, District Consumer Union te leh IOCL Official te tangkawpin hma lak an tum a ni,” a ti a. Heng Home Delivery kalpui tawhna-ah te hian Point Delivery kalpui phal a ni tawh lo tih sawiin, September, 2026-ah Notified Town zawng zawngah Home Delivery hi 100% kalpui tum a nih thu a sawi bawk.

Supply Minister B. Lalchhanzova chuan tun hunpui lo thleng tur inbuatsaihna atan IOCL lam chuan December 13, 2025 hma ngei hian LPG Booking backlog/pending te clear vek turin a hriattir tawh tih pawh sawiin, “Distributor zawng zawngin hemi hnuah hi chuan booking nghah chhung hi ni 2 aia rei an rial tur a ni lo,” a ti a, Distributor hma la thalo te chungah IOCL lamin an chungah action a la zel dawn tih pawh sawiin, a tul angin FCS&CA pawhin enzuiin hma a la ang tih a sawi a. “Hunpui lo thleng turah hian Kohhran zawng zawngin Commercial Cylinder (19 kgs) a tam thei ang ber an hmang tur a ni,” a ti bawk a. Vairente leh Sairang inkar kawng pawhin ziaawm lam a pan zel takah chuan IOCL lam pawhin Mizoram a Gas tih thlen kawngah harsatna an nei tawh lo tih an puang bawk

Hei bakah hian Supply Minister chuan Distributor ten Gas an deliver reng rengin Customer/Consumer hmuh lai ngeiin an buk hmasa tur a nih thu leh Delivery boy ten a bukna an keng zel tur a nih thu a sawi a, Gas Distributor te hian chhan eng vang mahin kawng lakah Gas Cylinder an unload tur a nih loh thu leh an Godown-a thlen hmasa vek tur a nih thu a sawi a, “Home delivery-a Gas pekchhuah tur te hi an Godown atangin dan angin check sa vekin an load chhuak leh ang,” a ti bawk.

Sawrkar laipui ruahmanna anga Pradhan Mantri Ujjwala Yojana (PMUY) hnuaia a thlawna LPG Connection pek chungchang pawh Supply Minister chuan sawifiahin, “Free Gas connection hi chhungkaw harsa Gas connection nei lo, thla khata Rs. 10,000/- lalut tling lo te tan dil theih a ni a. A diltu hi hmeichhia kum 18 tling tawh chhungkaw member zîng a mi a ni tur a ni. Mahni hnaih ber Gas Distributor/a Bialtu Distributor hnenah ngaihven theih a ni,” tiin January 31, 2026 aia tlai lovah a dil theih thu leh online (PMUY : New Ujjwala 2.0 Connection) in dil theih reng a nih thu a sawi bawk.

PMUY hnuaia Gas Connection dil duhte tan Deprivation Declaration Certificate (Form hi Distributor te hnen atangin emaw, MCU Hqrs. te atangin whatsapp-ah a dil theih bawk) te, Passport thlalak, Ration Card leh Ration Card a hming chuang zawng zawng Aadhaar bakah Bank Account te a ngai tih a sawi.

Tun dinhmunah Mizoram-a PMUY Connection awm zat chu 36,031 chauh a la nih thu Minister chuan sawi bawkin, hei hi State quota bik awm lo a nih thu a sawi a, Distributor thenkhat in an neih thahnem viau laiin thing-tlang Distributor thenkhat hian an la nei tlem hle tih sawiin, “Hei hi Sawrkar chuan a ngaipawimawh hle a, nei tam tura tan la turin a hriattir a ni,” a ti bawk.