CMRF-ah cheng nuai 279 chuang chhunluh a ni tawh

Kum 2023 December ni 18 atanga kumin thlengin Chief Minister's Relief Fund (CMRF)-ah mimal leh pawl hrang hrangin cheng nuai 279 chuang an chhunglut tawh a; CM Refief Fund atang hian pawl leh mimal engemaw zat hnenah tanpuina cheng nuai 220.88 pekchhuah a ni tawh.

Chief Minister's Office-in a tarlan danin, kum 2023 December ni 18 atanga chhiarin Chief Minister's Refief Fund-ah hian pawl leh mimal hrang hrang 356-in Online, Cheque leh pawisa tlang hmangin Rs. 2,79,27,550/- an chhunglut a; sawrkar kum kal mekah kumin April ni 1 atanga Zirtawpni thleng khan mimal leh pawl 80-in cheng nuai 31.33 an pe tawh a ni. 

CM Refief Fund-a sum chhunluh te hi kawng hrang hranga hman thin a ni a; CMO-in a tarlan danin December 21, 2023 atanga chhiarin CM Refief Fund atang hian mimal leh pawl hrang hrang 1,105 hnenah tanpuina Rs. 2,20,88,459/- pek a ni tawh a; sawrkar kum kal mekah mimal leh pawl 411 tanpui nan cheng nuai 42.28 hman a ni tawh bawk a ni.

Chief Minister's Relief Fund (CMRF) kaltlanga tanpuina sum hi damlo, khawsak harsa, Home leh hmeithai In sak tanpuina atan te, damdawi In-a damlo awmna ba rulhna atan te, Oxygen Concentrator, Wheelchair leh Bengdâr leina atan te, Raltlan Relief Camp sakna atan te, Cyclone Remal vanga chhiatna tâwkte leh leimin/lungrem chim siamthatna atan te, vantlang hnatlang puihna atan te, Rial-in Inchung a den chhiatte Rangva leina atan te, Sabereka khuangkaih avanga In chhia sakthatna leh tuikawng chhia siamthatna atan te, Central YMA Disaster Response Team mamawh leina atan leh thildang hrang hrang atan te pekchhuah thin a ni. Chief Minister's Relief Fund (CMRF) hmuhna leh hmanna te hi CM Office website, https://cmonline.mizoram.gov.in/ ah en theiha tarchhuah a ni.