Lonei-a eizawng te chawikan hi kan ram chawikanna a ni - Chief Minister

Chief Minister Lalduhoma chuan, “Kan ram mipui zaa sawmriat deuhthaw te hi Lonei a eizawng an la nih avangin heng mite chawikan hi kan ram chawikanna a ni,” tiin NABARD sum hmanga din Megawatt 10 pechhuak thei Thenzawl Solar Power Plant chu an hawng dawn hnai niin a sawi bawk.

National Bank for Agricultural & Rural Development (NABARD) Mizoram Regional Office in Assembly Conference Hall, Aizawl-a ‘State Credit Seminar 2026-27’ an buatsaih nimin-a a hmanpuina ah Chief Minister Lalduhoma chuan NABARD kaltlangin sawrkar chuan hmasawnna hna tam tak a thawh thin thu leh ram hmasawnna ke pen tichaktu pawimawh a nih thu sawiin, NABARD kaltlanga hmalak theihna hi kan ngah hle tih a sawi a. “Kan hmalak tawh chinah pawh kan tluang hle. NABARD sum hmanga din Megawatt 10 pechhuak thei Thenzawl Solar Power Plant chu kan hawng dawn hnai a, Megawatt 5 pechhuak thei dang pawh Sumsuih ramah kan thawk leh dawn a. Chief Minister Rubber Missions pawh chak taka kalpui niin nikum chhung khan Rubber kung nuai li leh singnga kan phun hman a. Kumin ah a dang 11,58,000 phun leh kan tum,” a ti a. “Kan ram mipui zaa sawmriat deuhthaw te hi Lonei-a eizawng an la nih avangin heng mite chawikan hi kan ram chawikanna a ni a. Kan Bank te hi thingtlang mipuite banphak-a an inchhawpchhuah a ngai. Tunah hian Mizoram-ah Bank Branch 278 kan nei mek a, an zinga 180 hi Aizawl, Lunglei leh Kolasib District-ah te an awm a, District dang pariat te hian Branch 95 an intawm mek a, zau zawka lo inzarpharh turin ka ngen a ni,” a ti bawk.

“Tunhnaia NITI Aayog Sustainable Development Index report thar bera kan dinhmun that dan khan kan hmalakna ten rah tha an chhuah zel a ni tih min hrilh a ni,” tiin Chief Minister chuan, “Kan lo tarlan tawh angin NITI Aayog Sustainable Development Index thar berah hmarchhak ah Hnahthial District chu pakhat niin Champhai chu pahnihna an ni a. Kolasib District chu pakuana a ni,” a ti bawk.

He hunah hian Chief Secretary Khilli Ram Meena chuan Keynote address sawiin, Sector hrang hranga NABARD kaltlanga Mizoram sawrkar hnathawhte leh hmabak la awm te a tarlang a. Seminar fel fai tak an buatsaih avangin lawmthu a sawi bawk a. Agriculture & Farmers Welfare changtu Secretary Ramdinliani chuan thu sawi bawkin sawihona neih a ni bawk.

State Focus Paper 2026-27 hian Priority Sectors-a hmalakna tur sum ruahman (projection) cheng vbc. 4349.71 a siam a, Agriculture leh a kaihhnawih lamah cheng vbc. 2260.99 dah a ni a, MSME lamah cheng vbc. 1500.35 ruahman a ni a, Export Credit-ah cheng vbc. 6.55, Education-ah cheng vbc. 18.51, Housing Sector-ah cheng vbc. 432. 35, Social Infrastructure-ah cheng vbc. 36.30, Renewable Energy-ah cheng vbc. 24.67 leh thil dangah cheng vbc. 70 te ruahman a ni.