Ruang 1,613 phurh nan cheng nuai 167.81 pe tawh

Mizoram sawrkarin khualkhuaa thite ruang phurh man a tum sakna, 'Assistance for Transportation of Bodies of Deceased Persons within Mizoram' kaltlangin ruang 1,613 phurhna man cheng nuai 167.81 pek a ni tawh.

Ruang phurh man buaipuitu Social Welfare Department atanga Akashvani News Aizawl thudawn danin, ruang phurhna senso sawrkarin a tum sakna hi nikum (2024) September thla khan hawn a ni a, December thla atangin ruang phurh man hi pek tan a ni. Nikum September thla atanga nimin, December ni 9, 2025 thleng khan Social Welfare Department chuan ruang phurh man dilna 1,613 an dawn atangin cheng nuai 167.81 an pe tawh a; Social Welfare Department hotute chuan ruang phurh man dilna hi online hmanga tih theih turin Portal siam a nih thu leh peihfel a nih tawh thu an sawi rualin, Portal hi hman tura tlangzarh ala nih loh thu leh thawktute tan pawh Portal hman dan training buatsaih a la nih dawn thu an sawi a ni.

Mizoram sawrkar chuan ruang phurhna senso tur hi kum 2024-25 leh kum 2025-26 atan budget-ah cheng nuai 500 ve ve a dah a; ruang phurh inkaihhruaina in a tarlan danin, ruang phurh tur chu a thlenna tur km 20 aia hnai a ni tur a ni lo a, km 20 piah lamah chuan tu tan pawh hman theih niin lirthei thlen theih chin a huam a ni.

Inkaihhruaina ang chuan, ruang phurhna lirthei hman man chu State Transport Authority (STA) in rate a siam anga kalpui a ni a; ruang phurhna man sawrkarin a peksak hian lirthei pakhat chiah a huam a, lirthei hman theihah hian cheng nuai 17 man chin chunglam lirthei a huam lo a ni. Ruang phurhna hlat zawng chhût nan ruang chhuahna atanga a dahna hmun inkar hlat zawng lâk tur a ni a; lirthei thlen lohna khua a nih chuan lirthei thlen theih tàwpna thleng niin Ruang phurhna chu kawng tawi thei ber hman tur a ni bawk.