Sawrkar in kawng a sial laiin thalaite an lo inbuatsaih lovang tih an hlau tih CM-in a sawi

Chief Minister Lalduhoma chuan sawrkarin mi taima leh thawkrimte tana hmasawn theihna kawng zau taka kan sial laiin, thalaite zawk an lo inbuatsaih lo vang tih an hlau tih sawiin, inelna hrang hranga hnamdangte kan tluk loh thin chhan chu kan taihmakna leh tumruhna in min hruai thlen phak loh vang niin a sawi bawk.

Govt. Serchhip College in ‘4th Winter Cum Cultural Fest’ an buatsaih hawnna nimin-a an College Campus-a an buatsaih a hmanpuina ah Chief Minister Lalduhoma chuan tunhnaiah zirlai naupangte zingah hun a hmang zauh zauh tih sawiin, taihmak leh tumruh a tulzia a hrilh mawlh mawlh thin tih a sawi a. “Kumin May thla khan Mizoram chu Fully Literate State-ah kan inpuang a, India rama a hmasa ber kan ni. Amaherawh chu India ram huap inelna hrang hrangah hnamdangte kan pha lo hle. A chhan ber chu National Exam-ah kan Tribal-puite kan tluk loh vang a ni,” tiin “Hna hi chu a awm a, ST quota pawh kan hnawhkhat zo ngai meuh lo. Kan taihmakna leh tumruhna hian min hruai thleng phak thin lo zawk a ni,” a ti a. “Sawrkar hna hi a sang tel kan la tawh a, a tling leh tlakte fair takin an lut thin. Thlai thar panga-ah Support Price kan pe a, mahni ke-a din tuma hma la, pawmtlak project neite hnenah a pung awm lo, dahkham ngai bawk si lovin Bana Kaih loan kan pe bawk. Sawrkarin mi taima leh thawkrimte tana hmasawn theihna kawng zau taka kan sial lai hian, thalaite zawk hi in lo inbuatsaih lo vang tih kan hlau a ni,” a ti a ni.

India rama College endiktu, National Assesment & Accreditation Council chuan College tha an tehna hrui pakhatah ‘Vantlang tana College luanchhuahna’ a hmang tel tih Chief Minister chuan sawiin, “Kan hriat theuh angin Serchhip College hi NAAC Grade A kawl mektu a ni a, Grade sang zawk hmu tura tan lak chhoh zel a tul avangin vantlang tana Fest changtlung tak neih hi a tha viauin ka hria. He Fest hi amah mai pawha Community Activity a nih tawh bakah Fest atanga sum leh pai hmuhchhuahte chu College-a Club hrang hrang ten activity neihna atan in hmang leh dawn niin ka lo hria a. Kawng hnihin College Activity lamah kan hlawkpui dawn a ni,” a ti bawk.

Govt. Serchhip College in ‘4th Winter Cum Cultural Fest’ an buatsaih hawnna hun hi an College Principal C. Laldintluanga chuan kaihruaiin “Kan College zirlai naupangte leh an chhungkua te, Serchhip mipuite ngei pawh hian han hawi thawven an mamawh tih kan hmu a. Zirlai naupang ten Fest an buatsaih hian an Entrepreneurship Skill lam a tanpui nasa tih kan hmu leh zel a. Chung thil pawimawh tak takte rilrua hre chungin he fest hi kan buatsaih a ni,” tiin Organising Secretary Dr. Zarzosanga chuan he Fest atan hian Budget cheng nuai 5.6 an siam thu leh Chief Minister hian engemaw zat a pek thu a sawi bawk.