New India Mission zulzui-a New India Internship (pilot) kalpui tur chungchang ah Minister kawm

National Institute of Technology (NIT) Mizoram leh Indian Institute of Technology (IIT) Madras a thawk Zirtirtu leh Zirlaite chuan nimin khan RD&A Minister Prof. Lalnilawma chu a Pisa-ah an kawm.

IIT Madras leh NIT Mizoram tangkawp hian Mahatma Gandhi piancham-phaphak vawi 150-na hriatrengna atan leh Prime Minister Narendra Modi-a'n a ngaih pawimawh em em New India Mission zulzuiin New India Internship (pilot) an duang chhuak a, heng zirna In pahniha zirlaite hian Mizoram-ah December ni 16, 2025 atanga January ni 10, 2026 thlengin New India Internship hi an kalpui dawn a ni.

He internship programin a tum ber chu Mizoram chhunga thingtlang khuate harsatna leh mamawh hrang hrangte hriatchhuah leh tunlai thiamna (technology thar ber ber) hmanga chung harsatnate sutkian a ni a. Intern-te leh heng Institution pahnih a zirlaiten Field Research-te neiin Technology hmanga harsatna sutkian dan tur kawng an zir dawn a ni. Internship Team-ah hian IIT Madras atangin Student 11 leh Faculty Member 3 an tel a, NIT Mizoram atangin Faculty Member 3 leh zirlai 21 an tel dawn bawk a ni.

Nimin-a an inkawmna ah hian Minister Prof. Lalnilawma chuan National Institute of Technology (NIT) Mizoram leh Indian Institute of Technology (IIT) Madras ten remhre taka thawhho an tum chu lawmawm a tih thu a sawi a, rampum huap pawha zirna In tha leh chhuanawm ten Zoram thingtlang khuate hmasawnna tur tunlai thiamna thar ber ber hmanga an zirchiang tur chuan rah tha tak a chhuah beiseiin duhsakna a hlan a ni. He inkawmna ah hian Minister hi RD Department-a Addl. Secretary V. Lalengmawia leh Director K. Lalrohlua bakah Joint Secretary Laltanpuia Hnamte, MzSRLM-a CEO Zosangzuali Pachuau leh Official dang ten an tawiawm a. He hmalakna an kalpui tura thil pawimawh hrang hrangte an sawiho bawk a ni.