Feb. 9 atangin Gospel Camping

Serchhip District-a Ruihhlo ngai te puala Gospel Camping neih tura ruahman chu nakum Feb. 9 atanga neih tura ruahman a ni.
He Camping neih tur chungchang ngaihtuah hian nimin khan Organising Committee chu an Chairman leh Addl. DC Lalrinzuala hovin Serchhip DC Meeting Hall ah an thukhawm a, Nasha Mukt Bharat Abhiyan (Drug Free India) hmalakna hnuaia ruihhlo ngaite puala Camping hi February ni 9, 2026 (Thawhtanni)-a tanin February ni 20, 2026 (Zirtawpni) thleng neih tura ruahman a ni a, tum khat chauh Camping hi neih tur niin Speaker atan Frederick Lalrindika (Bethel Ministry) chu hman a ni anga, New Serchhip Presbyterian Kohhran Biak Inah Camping hi neih tur niin Follow up programme pawh he Biak In-ah vek hian neih leh tur a ni anga, February ni 21 atanga 22 thlengin mipui a duh apiang chhim theihin hun hman zui tur a ni ang.

Serchhip District chhung khawi khua atang pawhin Zu leh ruihhlo ngai, a mamawhtu apiang he Camping-ah hian luh theih a ni dawn a. Kohhran belh bik nei loin Organising Committee-ah hian Serchhip Town chhunga Kohhran hrang hrang 16-a hruaitute, sawrkar hnathawk te leh tlawmngai pawl zawng zawng aiawhte an tel a ni.