‘Mizoram Statistical Handbook 2024’ tlangzarh a ni

Economics & Statistic Department buatsaih ‘Mizoram Statistical Handbook 2024’ chu tlangzarh a ni leh ta a, Vawiin atang hian Economics & Statistic Directorate, GE Branch-ah Rs. 100 in a lei theih ang.

‘Mizoram Statistical Handbook 2024’ hi Planning & Programme Implementation Department-a Commissioner & Secretary, Vanlaldina Fanai chuan nimin khan Chief Minister Conference Hall-ah a tlangzarh a, Economics & Statistics Department-in Statistical Handbook 2024 tha tak mai, English leh Hindi-a buatsaih an tlangzarh thei chu lawmawm a tih thu sawiin, “He HandBook buatsaih tura in hahzia hi ka hriatpui che u avangin lawmthu ka hrilh che u a ni,” a ti a. Data dik leh rintlak neih chu hmasawnna hnathawh kawng tinrengah a pawimawh thu pawh sawiin, Vawiin a kan data thar pawh hi kan chhawr tangkai hle ang. Handbook chhuah loh kumah Abstract tihchhuah zel a nih avangin kumtin in data hi kan update zel dawn a. Data tha zawk leh kimchang zawk nei turin kan inpuahchah sauh sauh dawn nia,” a ti bawk.

Economics & Statistics Department Director B. Lalrinhlua chuan ‘Mizoram Statistical Handbook 2024’ tlangzarhna hun hi kaihruaiin Statistics chu inchirhthehna tura siam a nih loh thu leh ram hmasawnna ruhrel buatsaih nana hman tur data a nih thu a sawi a. Publication release khawtlai thin chhan chu Department, NGO leh company ten Statistical data an pek tlai thin vang a nih thu sawiin, “Za-a 50 (50%) aia tam hi a huna data min pe thei lo, keimahni in Reminder Letter, Telephone Call leh Office-a luhchhuaha kan dilchhuah an ni. Tun tuma publication a chhuah tlai chhan pawh company 2 leh Department pakhat data kan hmu thei lova, kan dil thlawn rei deuh a, kan telh ta lo nghe nghe a ni,” a ti.

He hunah hian Economics & Statistics Department-a Asst. Director Lalhmangaihsangi Ralte chuan Technical report pein, Statistical Handbook 2024-ah hian Central leh State Department hrang hrang, Private Company, NGO, Kohhran, Financial Institution leh Official Report atang-a data lakkhawmte dah a ni a. Kumin ah hian a tum hnih nan tawng chi hnih, Hindi leh English-a buatsaih a ni.

Handbook hi Sector hrang hrang- Socio-economic, Demographic, Environmental leh Administrative Statistics-te a kim thei ang bera dahna a ni. Kumin ah hian tawng chi hnih- Hindi leh English-a buatsaih a ni a, Nikum ah khan Statistical Abstract 2023 kha Hindi leh English-in an lo tichhuak tawh bawk a ni. Data dik leh rintlak- hmasawnna kawng duanga thawktu Planners te, lehkha zir mek leh hna zawng mek te, research ti mekte, sawrkar hnathawkte, Mizoram pawn atanga lo kal tourist te leh Mizoram mipuite’n tangkai taka an hman theih tura buatsaih a ni.