Mizoram-a HIV kai zingah mahni anpui kawp an pung

Nikum April thla atanga kumin October chhungin Mizoram-ah HIV hrik kai mi 3,117 hmuhchhuah a ni a, HIV hrik kai hmuhchhuah zingah kumtin mipa, mahni anpui kawp atanga kai an pung chho zel niin a lang.

December 1, 2025-a World AIDS Day 2025 hmannaah he thu hi sawiin Mizoram State AIDS Control Society (MSACS) Project Director Dr. Jane R. Ralte chuan April, 2024 atanga October, 2025 chhung bika Mizoram-ah HIV kai hmuhchhuah mi 3,117 awmin an zinga mi 2,039 chu mipa an ni tih sawiin, hmeichhia 1,022 an awm tih a sawi a. Hemi hun chhunga HIV kai hmuhchhuah mi 2,066 (70.03%) chu mipat hmeichhiatna (sex) atanga kai an ni tih sawiin, Sex bikah hian a zatve aia tam, mi 1,143 (55.3%) chu kawppui nei lai an ni tih a sawi a, inhrechiang lo leh a rem ang ang kawp thin (Casual, Non-Commercial, Non-Regular) aatanga kai mi 710 (34.3%), mipa mahni anpui kawp (homo sexual) atanga kai 160 (7.7%) leh hmeichhe inzuarte atanga kai 53 (2.5%) an awm tih tarlan a ni bawk.

Mipat hmeichhiatna dawtah hian Mizorama HIV inkaichhawnna tam ber chu hriau thianghlim lo inhmantawm atangin a ni a, mi 974 (27.3%) chu inchiuna hriau inhmantawm vanga kai niin nu atanga naute-ah 55 (1.8%) leh chhan hriat loh 22 (0.74%) an awm bawk.

MSACD Project Director Dr. Jane R.Ralte chuan sex atanga HIV kai hmuhchhuah zingah kumtin mipa mahni anpui kawp atanga kai an pung chho zel tih sawiin, HIV chu a hlauh-awm a, a enkawlna ART damdawi a awm avanga hlau lo an awm thin nia hriat a nih thu a sawi a, ART chu natna chak tak hmet mit tura duan a nih avangin a chak a, taksa ah side effect hrang hrang a neih thin avangin HIV vei lo tura an nun hmang turin Mizoram mipui, a bikin thalaite a sawm bawk a ni.