Hmeichhia te hamthatna leh humhalhna Dan hrechianga hmang tangkai turin CM-in a chah

Chief Minister Lalduhoma chuan hmeichhia te chu an hamthatna leh humhalhna Dan hrang hrang hrechianga hmang tangkai turin a chah.

Nimin khan Aizawl Vanapa Hall-ah ZPM AMC Area Zonu Conference hmanpuiin Chief Minister Lalduhoma chuan hmeichhiate hamthatna leh humhalhna chi hrang hrang te sawiin, “Kan zahawmna leh kan inhumhimna Dan chi hrang hrang te, kan hamthatna dan te hi hrechiang ila, hmang tangkai ang u,” a ti a, “Hleilenna avanga harsatna te hi tawngpawng sepui ruah tur ngawt tur a ni lo. District tinah hmeichhe tanpui ngaite tan One Stop Centre a awm a. Hmeichhia, naupang harsatna tawkte tan Helpline No. 1098 leh Puitling tan Helpline No. 181 te biakpawh theih reng a ni. Hmeichhiate tanpuina leh humhimna Mission Shakti, Beti Bachao Beti Padhao, Shakti Sadan te hi kan hriat a tha. Hnathawh neite tan Working Women Hostel 4 kan nei sa a, kan sawrkarin 7 a sak belh mek a. Hmeichhe naupang tana Banking Scheme tha tak tak te hi hman tangkai nachang hria ang u,” a ti bawk.

An (ZPM) Party in hmeichhia te an ngaih pawimawh thu pawh Chief Minister chuan sawiin, “Gender Budget kan siam a, hmeichhe puala Budget dah hmasa ber kan ni. Village Council leh Local Council-ah ZPM atangin hmeichhe Candidate thahnem tak an tling a, engemawzat chu Chairman/President an ni. Heng hmeichhe chhuanawm tak tak te hi kan party Headquarters chuan lawmpuina thuchei a hlan a ni. Lunglei Municipal Council-ah ZPM kan solid a, Reserve Seat 4 bakah General Seat 2 hmeichhia ten an luah mek. Aizawl Municipal Corporation-ah ZPM-in Reserve Seat 5 kan luah bawk. ZPM sawrkar chu Hmeichhe Cabinet Minister nei hmasa ber kan ni a, hmeichhe MLA nei tam ber kan ni bawk,” a ti a ni.

He hunah hian Minister B. Lalchhanzova pawhin ZPM-ah hmeichhia ten a lailum an luah  thu sawiin, “Political rights pek kan ni a, ram rorelna ah vote thlaktu leh mi thusawi ngaithlatu tur ringawt kan ni lo a, eirawng lo bawltu leh hmun phiattu tur ringawt kan ni lo a, kan tel ve tur a ni,” tiin kan ram kan hnam kalsiamah hian tel ve tur leh pangngai taka nung turin chanvo an neih thu leh chumi tur chuan dan in a humhalh thu te a sawi bawk a ni.