MYC kaltlangin thalai 400 ten hna an hmu tawh

Mizoram Youth Commission (MYC) Chairman Malsawmzuala Ralte chuan ZPM sawrkar hnuaiah MYC kaltlangin thalai 400-in hna an hmuh tawh thu a sawi.

Niminpiah-a Aizawl Press Club a thuthar thehdarhtute a kawmna ah MYC Chairman Malsawmzuala Ralte chuan kum 2024-25 leh kum 2025-26 chhunga MYC hmalakna, hlawh-tlinna leh hmachhawpte a tarlang a; kum 2024-25 chhung khan Hotel Management, Food & Beverage hnuaiah thalai 122-in hna an hmu a, kumin ah mi 136-in an hmu tawh a, kumin sawrkar kum kal mekah MYC Coaching Class kaltlang hian mi 66-in sawrkar hna an hmu tawh bawk.

National Skill Development Corporation nen tangdunin MYC Office, Aizawl-ah Japan tawng zirna hawng turin an indawr mek thu a sawi a, MYC leh Taiwan sawrkar thawhdunna kaltanga Mizo nula pakhat Chinese (mandarin) tawng zir mek chuan a zo tawh a, a remchan danin MYC Office-ah Chinese tawng zirna hawn a nih dawn thu sawiin, Learnet Guwahati nen tangdunin Germany-a Nurse hna thawk tur Mizo thalai 6 chu German tawng zir tura ziahluh fel an nih tawh thu te a sawi a. Maid Connect Project an kalpui kaltlangin Mizo talai awmpui hna thawktute tan hamthatna leh venhimna tur duangin, kumthar lamah mumal zawka kalpui an tum a sawi bawk.