Fisheries Minister in Tuipui South Fish Festival a hawng

Fisheries Department leh Tuipui South khawtlang tangkawpin an buatsaih, ‘Tuipui South Fish Festival, 2025’ chu nimin khan Tuipui South-ah Fisheries Minister Lalthansanga chuan a hawng.

Tuipui South Fish Festival hawnna hunah hian Fisheries Minister chuan kum tam tak chhung tha tak maia Sangha an lo humhalh tawh, awmze nei taka man theihna hun buatsaih a ni chu lawmawm a tih thu sawiin, a hlawhtlin nana hun leh tha sengtu khawtlang mipuite bakah Department lama thahnem ngai taka thawktute chungah lawmthu a sawi a, Fisheries Department kal dan phung pawh tihdanglam chhoh zel an tum thu sawiin, Central Scheme, PMMSY chu party mi leh sa te duhsak nan a hmang lovin a ti tak tak duhte hnenah chauh pek thin a nih tawh tur thu a sawi a, PMMSY chang ni lovin scheme hrang hrang, Bana Kaih Scheme ngeiah pawh tum tak tak, ti tak tak te hnenah chauh hamthatna hi pek thin a nih tawh thu a sawi bawk.

He hunah hian Bialtu MLA Jeje Lalpekhlua pawhin Fish Festival buatsaih a ni thei ta chu Department leh khawtlang mipuite tanrualna leh hmalakna zar a nih thu a sawi a. Social Media-ah Kut leh Festival hrang hrang sawiselna awm thin mah se khaw mipuiten an chhawr a, hlawkna an neih phahna a nih chuan chu chu an ngaih pawimawh ber a nih thu a sawi a. Tunhnaia Hnahsin Kut neih takah khan khaw chhungah cheng nuai 1500 chuang sum leng vak a awm thu tarlangin, chu chuan heng Kut leh Festival kan tih te pawimawhna a tarlan thu a sawi a ni.

He Festival hi December ni 17 atanga ni 19 thleng neih tura ruahman niin ni khatah Chawhma leh Chawhnu-ah Nghakuai chiahna hun hi siam a ni a. A ni khatna leh ni hnihna ah hian ticket man hi Rs. 3000 niin a ni thumna chawhma-ah ticket Rs. 2000 man niin chawhnu-ah Rs. 500 man a ni thung anga. Hriat theih chinah nimin-a Sangha an man len ber chu Pharawng Phuhang Sangha niin kg. 14-a rit a ni.