Work Order tihchhuah tawh Court in ‘Stay’ sak

Mizoram Power and Electricity Department in Tender a chhuah Earnest Money Deposit (EMD) chungchangah India Danpui bawhchhiatna a awm nia petition lut chu Gauhati High Court, Aizawl Bench chuan ngaihtuahin 'Strengthening of Transmission for Sustainable Power Supply in Mizoram under NESIDS (OTRI)' thawk tura Work Order tihchhuah tawh chu chawl lailawk turin tun thla ni 9 khan thupek a chhuah.

Thulakna in a tarlan danin thubuai thehluttu M/S FS and T Electricals aiawha ding Ukil chuan party 4- Mizoram Sawrkar, Power and Electricity Department, E-in-C, P & E leh Work Order pek tak M/s GK Fiscon Ideas JV lakah thubuai thehlutin NIT No. P-37117/1/25-E-in-C(PM)/13, Strengthening of Transmission and Transformation System for Sustainable Power Supply in Mizoram under NESIDS (OTRI) tender a chhuah EMD pawm anih danah P&E Department chu kalphung dikloa EMD dawng niin a puh a. India Danpui 226 bawhchhiatna a nih thu leh Sawrkar chet dan chu dan kalh, duhsak bik nei leh langtlang loah a puh bawk a. Hetiang case hi Supreme Court-ah lo awm tawh bawk a ni.

Petition thehluttu lam chuan ni 12.11.2025-ah bid security chu dan angin Standard Bidding Document (SDB) leh EMD, JV credentials leh lehkha ngai dangte nen thehluh a nih hnuah 12.11.2015-ah Joint venture a awm lo tiin Sawrkar chuan a hnawl a. Anmahni lam hrilh hriat emaw, sawifiah turin emaw tihna a awm lo niin an sawi bawk a. Sawrkarin work order pek tak private firm hnenah a hna chu pek a ni ta niin an sawi.

Hetihlai hian sawrkar Ukil chuan Ministry of DoNER chuan 03.06.2025-ah project chu sanction tawhin thla 6 chhunga Work Order tichhuaha thla 24 chhunga thawh zawh hman anih loh chuan sum chu lapse thei anih thu a sawi a. Ni 19.09.2925-ah Tender tihchhuah a ni a, M/s GK Fiscon Ideas JV (respondent 4) chauh chu a chhangtu awmchhun a ni a, ni 6.11.2025-ah Tender kohna tihchhuah a ni leh a, hetah hian thubuai thehluttu pawhin an chhang ve ta a. Hmanhmawh thil a awm avang leh chhan tha tak a awm avangin ni 19.09.2925-a Tender M/s GK Fiscon Ideas JV hnathawk tura thlan a ni ta niin tarlan a ni.

NIT No. P-37117/1/25-E-in-C(PM)/13, Strethening of Transmission and Transformation System for Sustainable Power Supply in Mizoram under NESIDS (OTRI) tender bid pawm anih dan chu dan kalh anga cho an awm tak avang leh Supreme Court lamah Civil Appeal 1049/2019 a awm tawh avangin Mizoram Sawrkar chu hma la tawh hrih loa chawl lailawk High Court turin thupek a chhuah ta niin kan thu lakna chuan a tarlang a. Ni 15.01.2026-ah High Court ngaihtuah chhunzawm turin a ti leh bawk nia tarlan a ni bawk.