Japan mithiam te hnuaiah Mizo Coach te inzir dawn

Mizoram Sports hmelhmang thlak danglam tura hmalakna kal mekah Mizoram-a Sports Coach-te intuaitharna tur, 'Transforming Sport for the Next Generation: Developing Decision Makers' tih chu nimin khan Aizawl Republic Veng-a Hawla Indoor Stadium-ah Sports Minister Lalnghinglova Hmar chuan a hawng a. Mizoram State Sports Council, Nippon Sports Science University leh JICA tangkawpin an buatsaih Coach-te inzirnaah hian Zirtirtu turin Prof. Masamitsu Ito chu Nippon Sports Science University, Tokyo atangin a lo kal a, mi pawimawh hrang hrang ten rawn tawiawmin Dec. 18 thleng kalpui a ni ang.

Nimin-a he hun hman ah hian Sports Minister Lalnghinglova Hmar chuan khawvel huapa Sports lama mithiam leh zirtirtu tha kan chang thei chu a lawmawm takzet tih sawiin, “A man pek tur ni se kan pek theih loh turin a thlawna zirtirna a rawn pe thei hi kan lawm takzet a ni,” tiin Coach tha kan neih chuan Sports lamah hma kan sawn thei ang tih a sawi a. Sports lama hmasawn turin mi thiamte atanga zirtirna kan mamawh thu leh tun hun hi chhawr tangkai a pawimawh thu a sawi bawk.