Serchhip-ah DEAF chungchang inzirtirna neih a ni

Zirtawpni khan Serchhip-ah Depositor Education and Awareness Fund (DEAF) chungchang inzirtirna neih niin DEAF Account pawisa lut tawh mi 2 te chu an sum chinfelna lehkha hlan nghal an ni.
Tunhma chuan engemaw avanga Bank Account kum 10 chuang khawih chet tawh loh chu ‘Account thi’ tih mai thin niin chuta pawisa awm te chu RBI DEAF Account-ah a lut thin a, chuta pawisa tlingkhawm chu RBI in Financial Literacy Campaign leh mipui te hnena Bank lam thil pawi-mawh inhrilhhriatna (Awareness campaign) atan te an hmang thin a ni. Tunah erawh chuan sawrkar laipuiin Account neitu Customer te hnenah ngei an pawisa hi a bo a bang awmlova a luh theih nan dan a siam thar a. Bank Account kum 10 chuang khawih chet tawh loh (Account thi tawh emaw kan tih thin) a pawisa awm te chu a lakchhuah thei ta ni.

Hemi chungchang inzirtirna leh Financial Literacy Campaign chu Zirtawpni khan Serchhip DC Meeting Hall-ah neih a ni a, he hun hi SDO (Sadar) Rebecca Laldinmawii Hrahsel chuan hman-puiin Serchhip District chhhunga Bank Branch hrang hranga mimal leh pawl pawisa cheng nuai 19 vel zet kum 10 chuang account khawih chet tawh loh avanga DEA Fund-a a tang chu pawi a tih thu a sawi a. Hetiang zat mipui sum a neitu dik tak tan laklet theih a nih dan inzirtirna hun tha a awm chu lawmawm a tih thu sawiin, SBI Serchhip Branch-a DEAF Account pawisa lut tawh mi 2 te chu a hmunah DEAF (an sum kirna) chinfelna lehkha chu a hlan nghal bawk a ni.

He hunah hian Serchhip District-a Lead District Officer leh RBI Manager Sumit Mandal pawhin DEAF Account chungchang sawifiahin, mipuiten ‘I sum, i dikna chanvo’ tih chu kan hriat a pawimawh thu sawi a. Lead District Manager Lalnghawrliana pawhin DEAF Account chung-chang, Financial Literacy leh Financial Planning chungchangah zirtirna pein, Sum khawl pawimawhna te a zirtir bawk a ni.