Digital Crop Survey kalpui tha lawmman vbc. 60 dawng

Agriculture and Farmers Welfare Minister PC. Vanlalruata’n a Department chan Agriculture and Farmers Welfare department-in sawrkar laipui atangin Digital Crop Survey kalpui tha lawmman pakhatna a dawn thu sawiin, thawktute inpekna rahchhuah a nih thu a sawi bawk.

Niminpiah khan a Pisa-ah chanchinbu mite lenga sawmin Agriculture Minister chuan, lawmman pakhatna hian cheng vbc. 50 a ken tel thu sawiin, India hmarchhak State tan bik cheng vbc. 10 belh a nih thu a sawi a, Mizoram chuan a vai a belhkhawmin cheng vbc. 60 a dawng tih sawiin, Digital Crop Survey atana thil tul tam tak, Land Mark Geo-referencing leh Land Mark Application siamchawp a ni chunga Mizoramin pakhatna dinhmun a la thei chu thawktute inpekna leh thawhrimna rah a nih thu a sawi a ni.

Minister PC. Vanlalruata chuan Mizoram in a lawmman a dawn chu tehfung pathum zinga pakhat a nih thu sawiin, tehfung dang pahnih cheng vbc. 30 dawn theihna District tina khaw awmzat atanga 25% Digital Crop Survey kalpui leh cheng vbc. 15 dawn theihna, District tina khaw awmzat atanga 50% atanga Digital Crop Survey-ah pawh lawmman pakhatna dawng leh ngei thei tura theitawpa hma an lak leh mek thu a sawi bawk.