Marina Lalchhanchhuahi thihna chhui mek zel a ni

Tun thla ni 13 zan-a ruang chhar, Marina Lalchhanchhuahi thih dan chu ngawrh taka chhui zel mek niin MHIP General Hqrs. chuan a chunga kutthlaktu chu a phu tawk hremna pek ngei an phut thu an sawi.

Tarlan tawh angin December ni 1, 2025 atanga chin hriat loha bo Tanhril Veng-a cheng Marina Lalchhanchhuahi hi December 13 zan khan a ruang hmuh a ni a, a ruang hi Mizoram University Field thlangah ramvak in a hmu a, Police leh Forensic mithiam ten kalchilhin a tul ang ang an buaipui bakah he thihna thleng ah hian thu zawhfiah mi thenkhat te pawh an la a. Aizawl SP Zosangliana chuan Marina Lalchhanchhuahi thihna chungchangah Aizawl SP kaihruainain hnuchhui kalpui mek niin, Postmortem tihfel tawh a ni a, a taksa-ah hliam emaw, eng vang chiaha thi nge tih hriat theih mai a la ni lo a, hnuchhuina uluk taka kalpui a nih thu a sawi a ni.

MHIP General Hqrs. chuan thuchhuah siamin Tanhril Veng mi Marina Lalchhanchhuahi (26) mi rawng taka thah a ni chu pawi an tih thu leh a chunga kutthlaktu chu manchhuaha a phu tawk hremna pek ngei nise an duh thu an sawi a. Mizo Hmeichhe chunga hetiang pawikhawihna a thleng thin chu MHIP chuan a tuar thiam lo tih sawiin, hetiang thil a thlen tawh loh nan a tul anga hmalak zel an tum tih an sawi bawk.