Chawnpui Sports Centre hawng

Aizawl Chawnpui Veng-a ‘Chawnpui Sports Centre’ sak thar chu nimin khan UD&PA Minister K. Sapdanga chuan a hawng.

UD&PA Secretary Lalmalsawma Pachuau kaihhruaia Sports Centre hawnna hunah hian UD&PA Minister chuan Sports Centre sak thar a nih theih nana tha leh zung thawhtu hrang hrang, Bialtu MLA TBC. Lalvenchhunga te, khawtlang hruaitute, Contractor te, Sports Minister leh sawrkar hmasa ten hma an lo lak tawhnate fakin, thawhhona tha tak a awm avanga puitlin theih a nih thu a sawi a. Sports pawimawhzia sawiin, tunlai khawvelah sawrkar hnaa luh a harsat tawh thu leh chutih rualin Sports lamah thalaite tan eizawnna kawng zau zawk a inhawn mek thu a sawi a; Mizoram-ah pawh Sports Infrastracture tha tak tak kan nei tawh thu leh sawrkar pawhin theihtawp chhuaha hma a lak mek thu te, thalaite chu naupang te te an nih lai atanga mumal taka train an nih chhohna turin Empowering Mizoram Sports pawh kalpui tan a nih thu te a sawi bawk.

Chawnpui Sports Centre hi Project Cost chu cheng vbc. 3.83 niin SASCI atangin vbc. 3 hmuh a nih bakah State sawrkar sum atangin cheng nuai 83.37 hmuh a ni a; Contractor atan M/S Zothan Consultancy Services, Luangmual, Aizawl rawih niin May, 2023 khan sak tan a ni a, October 2025-ah sak zawh a ni. He Sports Centre hi chhawng 6 niin RCC Famed Structure a ni a, Seismic Zone 5 Specification leh Codes te hmanga design a ni a; Ground Floor leh Basement - I te chu lirthei dahna atana ruahman niin LMV 40 leh Two Wheeler 35 vel dah theihna tur a ni a; 1st Floor leh 2nd Floor hi 400 sqm a zau niin Badminton Court atan hman a ni a, Badminton Hall-ah hian 4.5mm a chhah Carpet tha chi KTR Product, Badminton World Federation Certified phah a ni bawk. Basement-II leh III te hi 275 sqm leh 125 sqm a zau an ni bawk.