Bairabi leh Sairang-ah Excise Station hawn tum a ni

Excise & Narcotics Department changtu Minister Lalnghinglova Hmar chuan nimin khan a Pisa-ah thuthar thehdarhtute kawmin Bairabi leh Sairang-ah Station thar hawn phalna an hmuh tawh thu a sawi.

Nimin-a thuthar thehdarhtute a kawmna ah hian END Minister chuan Zu leh ruihhlo do kawnga chak lehzuala hmalak a nih theih nan District thar pathum, Saitual, Khawzawl leh Hnahthial-ah Station thar an hawn thu sawiin, Rel a lo luh tak avangin Sairang leh Bairabi-ah te Station hawn phalna pawh Oct. 22, 2025 khan an hmu tawh bawk tih a sawi a. Hei bakah hian Motor thar 18 (LMV 14 leh 2wheeler 4) kan lei thar a, Department a chak lehzual theih nan post thar 16 - Asst.Commisioner 4, Inspector 3, Asst. Sub Inspector 3, Head Constable 3, Group ‘D’ 3 siam niin thawktu indaihlo phuhruk nan mi 28 lak thar niin midang 39 lak tum leh mek a nih thu a sawi bawk.

The Mizoram Liquor (Prohibition) Amendment Act, 2025 hnuaiah Mizorama thar Grep leh thlai leh thei rah tharchhuahte atangin Local Beer siam tuma hmalak mek a nih thu pawh Minister chuan sawiin, a siamchhuah leh zawrhchhuah dan pawh mumal leh tha zawka kalpui tum a nih thu a sawi a, The Mizoram Liquor (Prohibition) Amendment Rules, 2025 pawh October 1, 2025 khan Gazette-ah chhuah a ni tawh tih a sawi bawk.

Kum 2024 January atanga September 2025 chhungin Excise & Narcotics Department chuan Rakzu (Local zu) litre 1,10,277.400; Sapzu (IMFL) Bottle 46,409; Beer Bottle/Can 45,174 leh Fruit Wine litre 56,028 an man thu pawh Minister chuan sawiin, heng bakah hian Heroin kg. 80.594; Ganza kg. 801.067; Methamphetamine kg. 425.144; Opium kg. 1.193; Pseudoephedrine kg. 7.420; Cough Syrup kg. 822.365 leh Tramadol/Diazepam/Nitrazepam 7.966 kg. an man bawk tih a sawi a. Hemi hun chhung hian NDPS Act hnuaiah thubuai 1016 ziaklutin mi 1563 an man a, MLP Act, 2025 hnuaiah thubuai 12,047 ziaklutin mi 10,906 man an awm a, ME Act, 1973 hnuaiah thubuai 826 ziaklutin mi 787 an man bakah ND&PS & MLP Act hnuaiah ramdang mi 100 an man tih a sawi bawk.

Excise Minister chuan sawrkar sum bawm-a mi turin Revenue collection Rs.4,53,22,875/- zet an hmuh thu pawh sawiin, hetah hian ruihhlo an halral a tel loh thu a sawi a, “Ruihhlo tam tak kan man a, kan Department thawktute an hahin an thawkrim takzet zet a, kan man tam avang hian ruihtheih thil hi a van phah em ka hre lo, amaherawhchu Department erawh kan tangin thawktute an thawkrim a, fak an phu a ni,” a ti a. “Sawrkar Department hmasawn ber zinga mi kan niin ka hria a, ruihhlo kan dona kawngah leh Department thuamthat kawngah kan hmalakna leh hmasawnna kan thlirin Pathian khawngaihna leh awmpuina kan dawngin a lawmawm kan ti takzet a ni,” a ti bawk.